श्रीमहालक्ष्मीसहस्रनामस्तोत्रम्

ॐ तामाह्वयामि सुभगां लक्ष्मीं त्रैलोक्यपूजिताम् । एह्येहि देवि पद्माक्षि पद्माकरकृतालये ॥

oṃ tāmāhvayāmi subhagāṃ lakṣmīṃ trailokyapūjitām | ehyehi devi padmākṣi padmākarakṛtālaye ||

आगच्छागच्छ वरदे पश्य मां स्वेन चक्षुषा । आयाह्यायाहि धर्मार्थकाममोक्षमये शुभे ॥

āgacchāgaccha varade paśya māṃ svena cakṣuṣā | āyāhyāyāhi dharmārthakāmamokṣamaye śubhe ||

एवंविधैः स्तुतिपदैः सत्यैः सत्यार्थसंस्तुता । कनीयसी महाभागा चन्द्रेण परमात्मना ॥

evaṃvidhaiḥ stutipadaiḥ satyaiḥ satyārthasaṃstutā | kanīyasī mahābhāgā candreṇa paramātmanā ||

निशाकरश्च सा देवी भ्रातरौ द्वौ पयोनिधेः । उत्पन्नमात्रौ तावास्तां शिवकेशवसंश्रितौ ॥

niśākaraśca sā devī bhrātarau dvau payonidheḥ | utpannamātrau tāvāstāṃ śivakeśavasaṃśritau ||

सनत्कुमारस्तमृषिं समाभाष्य पुरातनम् । प्रोक्तवानितिहासं तु लक्ष्म्याः स्तोत्रमनुत्तमम् ॥

sanatkumārastamṛṣiṃ samābhāṣya purātanam | proktavānitihāsaṃ tu lakṣmyāḥ stotramanuttamam ||

अथेदृशान्महाघोराद् दारिद्र्यान्नरकात्कथम् । मुक्तिर्भवति लोकेऽस्मिन् दारिद्र्यं याति भस्मताम् ॥

athedṛśānmahāghorād dāridryānnarakātkatham | muktirbhavati loke'smin dāridryaṃ yāti bhasmatām ||

सनत्कुमार उवाच - पूर्वं कृतयुगे ब्रह्मा भगवान् सर्वलोककृत् । सृष्टिं नानाविधां कृत्वा पश्चाच्चि न्तामुपेयिवान् ॥

sanatkumāra uvāca - pūrvaṃ kṛtayuge brahmā bhagavān sarvalokakṛt | sṛṣṭiṃ nānāvidhāṃ kṛtvā paścācci ntāmupeyivān ||

किमाहाराः प्रजास्त्वेताः सम्भविष्यन्ति भूतले । तथैव चासां दारिद्र्यात्कथमुत्तरणं भवेत् ॥

kimāhārāḥ prajāstvetāḥ sambhaviṣyanti bhūtale | tathaiva cāsāṃ dāridryātkathamuttaraṇaṃ bhavet ||

दारिद्र्यान्मरणं श्रेयस्ति्वति सञ्चिन्त्य चेतसि । क्षीरोदस्योत्तरे कूले जगाम कमलोद्भवः ॥

dāridryānmaraṇaṃ śreyastivati sañcintya cetasi | kṣīrodasyottare kūle jagāma kamalodbhavaḥ ||

तत्र तीव्रं तपस्तप्त्वा कदाचित्परमेश्वरम् । ददर्श पुण्डरीकाक्षं वासुदेवं जगद्गुरुम् ॥

tatra tīvraṃ tapastaptvā kadācitparameśvaram | dadarśa puṇḍarīkākṣaṃ vāsudevaṃ jagadgurum ||

सर्वज्ञं सर्वशक्तीनां सर्वावासं सनातनम् । सर्वेश्वरं वासुदेवं विष्णुं लक्ष्मीपतिं प्रभुम् ॥

sarvajñaṃ sarvaśaktīnāṃ sarvāvāsaṃ sanātanam | sarveśvaraṃ vāsudevaṃ viṣṇuṃ lakṣmīpatiṃ prabhum ||

सोमकोटिप्रतीकाशं क्षीरोद विमले जले । अनन्तभोगशयनं विश्रान्तं श्रीनिकेतनम् ॥

somakoṭipratīkāśaṃ kṣīroda vimale jale | anantabhogaśayanaṃ viśrāntaṃ śrīniketanam ||

कोटिसूर्यप्रतीकाशं महायोगेश्वरेश्वरम् । योगनिद्रारतं श्रीशं सर्वावासं सुरेश्वरम् ॥

koṭisūryapratīkāśaṃ mahāyogeśvareśvaram | yoganidrārataṃ śrīśaṃ sarvāvāsaṃ sureśvaram ||

जगदुत्पत्तिसंहारस्थितिकारणकारणम् । लक्ष्म्यादि शक्तिकरणजातमण्डलमण्डितम् ॥

jagadutpattisaṃhārasthitikāraṇakāraṇam | lakṣmyādi śaktikaraṇajātamaṇḍalamaṇḍitam ||

आयुधैर्देहवद्भिश्च चक्राद्यैः परिवारितम् । दुर्निरीक्ष्यं सुरैः सिद्धः महायोनिशतैरपि ॥

āyudhairdehavadbhiśca cakrādyaiḥ parivāritam | durnirīkṣyaṃ suraiḥ siddhaḥ mahāyoniśatairapi ||

आधारं सर्वशक्तीनां परं तेजः सुदुस्सहम् । प्रबुद्धं देवमीशानं दृष्ट्वा कमलसम्भवः ॥

ādhāraṃ sarvaśaktīnāṃ paraṃ tejaḥ sudussaham | prabuddhaṃ devamīśānaṃ dṛṣṭvā kamalasambhavaḥ ||

शिरस्यञ्जलिमाधाय स्तोत्रं पूर्वमुवाच ह । मनोवाञ्छितसिद्धिं त्वं पूरयस्व महेश्वर ॥

śirasyañjalimādhāya stotraṃ pūrvamuvāca ha | manovāñchitasiddhiṃ tvaṃ pūrayasva maheśvara ||

जितं ते पुण्डरीक्ष नमस्ते विश्वभावन । नमस्तेऽस्तु हृषीकेश महापुरुषपूर्वज ॥

jitaṃ te puṇḍarīkṣa namaste viśvabhāvana | namaste'stu hṛṣīkeśa mahāpuruṣapūrvaja ||

सर्वेश्वर जयानन्द सर्वावास परात्पर । प्रसीद मम भक्तस्य छिन्धि सन्देहजं तमः ॥

sarveśvara jayānanda sarvāvāsa parātpara | prasīda mama bhaktasya chindhi sandehajaṃ tamaḥ ||

एवं स्तुतः स भगवान् ब्रह्म णाऽव्यक्तजन्मना । प्रसादाभिमुखः प्राह हरिर्विश्रान्तलोचनः ॥

evaṃ stutaḥ sa bhagavān brahma ṇā'vyaktajanmanā | prasādābhimukhaḥ prāha harirviśrāntalocanaḥ ||

श्रीभगवानुवाच - हिरण्यगर्भ तुष्टोऽस्मि ब्रूहि यत्तेऽभिवाञ्छितम् । तद्वक्ष्यामि न सन्देहो भक्तोऽसि मम सुव्रत ॥

śrībhagavānuvāca - hiraṇyagarbha tuṣṭo'smi brūhi yatte'bhivāñchitam | tadvakṣyāmi na sandeho bhakto'si mama suvrata ||

केशवाद्वचनं श्रुत्वा करुणाविष्टचेतनः । प्रत्युवाच महाबुद्धिर्भगवन्तं जनार्दनम् ॥

keśavādvacanaṃ śrutvā karuṇāviṣṭacetanaḥ | pratyuvāca mahābuddhirbhagavantaṃ janārdanam ||

चतुर्विधं भवस्यास्य भूतसर्गस्य केशव । परित्राणाय मे ब्रूहि रहस्यं परमाद्भुतम् ॥

caturvidhaṃ bhavasyāsya bhūtasargasya keśava | paritrāṇāya me brūhi rahasyaṃ paramādbhutam ||

दारिद्र्यशमनं धन्यं मनोज्ञं पावनं परम् । सर्वेश्वर महाबुद्ध स्वरूपं भैरवं महत् ॥

dāridryaśamanaṃ dhanyaṃ manojñaṃ pāvanaṃ param | sarveśvara mahābuddha svarūpaṃ bhairavaṃ mahat ||

श्रियः सर्वातिशायिन्यास्तथा ज्ञानं च शाश्वतम् । नामानि चैव मुख्यानि यानि गौणानि चाच्युत ॥

śriyaḥ sarvātiśāyinyāstathā jñānaṃ ca śāśvatam | nāmāni caiva mukhyāni yāni gauṇāni cācyuta ||

त्वद्वक्त्रकमलोत्थानि श्रेतुमिच्छामि तत्त्वतः । इति तस्य वचः श्रुत्वा प्रतिवाक्यमुवाच सः ॥

tvadvaktrakamalotthāni śretumicchāmi tattvataḥ | iti tasya vacaḥ śrutvā prativākyamuvāca saḥ ||

श्रीभगवानुवाच - महाविभूतिसंयुक्ता षाड्गुण्यवपुषः प्रभो । भगवद्वासुदेवस्य नित्यं चैषाऽनपायिनी ॥

śrībhagavānuvāca - mahāvibhūtisaṃyuktā ṣāḍguṇyavapuṣaḥ prabho | bhagavadvāsudevasya nityaṃ caiṣā'napāyinī ||

एकैव वर्ततेऽभिन्ना ज्योत्स्नेव हिमदीधितेः । सर्वशक्त्यात्मिका चैव विश्वं व्याप्य व्यवस्थिता ॥

ekaiva vartate'bhinnā jyotsneva himadīdhiteḥ | sarvaśaktyātmikā caiva viśvaṃ vyāpya vyavasthitā ||

सर्वैश्वर्यगुणोपेता नित्यशुद्धस्वरूपिणी । प्राणशक्तिः परा ह्येषा सर्वेषां प्राणिनां भुवि ॥

sarvaiśvaryaguṇopetā nityaśuddhasvarūpiṇī | prāṇaśaktiḥ parā hyeṣā sarveṣāṃ prāṇināṃ bhuvi ||

शक्तीनां चैव सर्वासां योनिभूता परा कला । अहं तस्याः परं नाम्नां सहस्रमिदमुत्तमम् ॥

śaktīnāṃ caiva sarvāsāṃ yonibhūtā parā kalā | ahaṃ tasyāḥ paraṃ nāmnāṃ sahasramidamuttamam ||

श‍ृणुष्वावहितो भूत्वा परमैश्वर्यभूतिदम् । देव्याख्यास्मृतिमात्रेण दारिद्र्यं याति भस्मताम् ॥

śa‍ṛṇuṣvāvahito bhūtvā paramaiśvaryabhūtidam | devyākhyāsmṛtimātreṇa dāridryaṃ yāti bhasmatām ||

अथ महालक्ष्मीसहस्रनामस्तोत्रम् अथवा कमलासहस्रनामस्तोत्रम् ।

atha mahālakṣmīsahasranāmastotram athavā kamalāsahasranāmastotram |

श्रीः पद्मा प्रकृतिः सत्त्वा शान्ता चिच्छक्तिरव्यया । केवला निष्कला शुद्धा व्यापिनी व्योमविग्रहा ॥

śrīḥ padmā prakṛtiḥ sattvā śāntā cicchaktiravyayā | kevalā niṣkalā śuddhā vyāpinī vyomavigrahā ||

व्योमपद्मकृताधारा परा व्योमामृतोद्भवा । निर्व्योमा व्योममध्यस्था पञ्चव्योमपदाश्रिता ॥

vyomapadmakṛtādhārā parā vyomāmṛtodbhavā | nirvyomā vyomamadhyasthā pañcavyomapadāśritā ||

अच्युता व्योमनिलया परमानन्दरूपिणी । नित्यशुद्धा नित्यतृप्ता निर्विकारा निरीक्षणा ॥

acyutā vyomanilayā paramānandarūpiṇī | nityaśuddhā nityatṛptā nirvikārā nirīkṣaṇā ||

ज्ञानशक्तिः कर्तृशक्तिर्भोक्तृशक्तिः शिखावहा । स्नेहाभासा निरानन्दा विभूतिर्विमलाचला ॥

jñānaśaktiḥ kartṛśaktirbhoktṛśaktiḥ śikhāvahā | snehābhāsā nirānandā vibhūtirvimalācalā ||

अनन्ता वैष्णवी व्यक्ता विश्वानन्दा विकासिनी । शक्तिर्विभिन्नसर्वार्तिः समुद्रपरितोषिणी ॥

anantā vaiṣṇavī vyaktā viśvānandā vikāsinī | śaktirvibhinnasarvārtiḥ samudraparitoṣiṇī ||

मूर्तिः सनातनी हार्दी निस्तरङ्गा निरामया । ज्ञानज्ञेया ज्ञानगम्या ज्ञानज्ञेयविकासिनी ॥

mūrtiḥ sanātanī hārdī nistaraṅgā nirāmayā | jñānajñeyā jñānagamyā jñānajñeyavikāsinī ||

स्वच्छन्दशक्तिर्गहना निष्कम्पार्चिः सुनिर्मला । स्वरूपा सर्वगा पारा बृंहिणी सुगुणोर्जिता ॥

svacchandaśaktirgahanā niṣkampārciḥ sunirmalā | svarūpā sarvagā pārā bṛṃhiṇī suguṇorjitā ||

अकलङ्का निराधारा निःसङ्कल्पा निराश्रया । असङ्कीर्णा सुशान्ता च शाश्वती भासुरी स्थिरा ॥

akalaṅkā nirādhārā niḥsaṅkalpā nirāśrayā | asaṅkīrṇā suśāntā ca śāśvatī bhāsurī sthirā ||

अनौपम्या निर्विकल्पा नियन्त्री यन्त्रवाहिनी । अभेद्या भेदिनी भिन्ना भारती वैखरी खगा ॥

anaupamyā nirvikalpā niyantrī yantravāhinī | abhedyā bhedinī bhinnā bhāratī vaikharī khagā ||

अग्राह्या ग्राहिका गूढा गम्भीरा विश्वगोपिनी । अनिर्देश्या प्रतिहता निर्बीजा पावनी परा ॥

agrāhyā grāhikā gūḍhā gambhīrā viśvagopinī | anirdeśyā pratihatā nirbījā pāvanī parā ||

अप्रतर्क्या परिमिता भवभ्रान्तिविनाशिनी । एका द्विरूपा त्रिविधा असङ्ख्याता सुरेश्वरी ॥

apratarkyā parimitā bhavabhrāntivināśinī | ekā dvirūpā trividhā asaṅkhyātā sureśvarī ||

सुप्रतिष्ठा महाधात्री स्थितिर्वृद्धिर्ध्रुवा गतिः । ईश्वरी महिमा ऋद्धिः प्रमोदा उज्ज्वलोद्यमा ॥

supratiṣṭhā mahādhātrī sthitirvṛddhirdhruvā gatiḥ | īśvarī mahimā ṛddhiḥ pramodā ujjvalodyamā ||

अक्षया वर्द्धमाना च सुप्रकाशा विहङ्गमा । नीरजा जननी नित्या जया रोचिष्मती शुभा ॥

akṣayā varddhamānā ca suprakāśā vihaṅgamā | nīrajā jananī nityā jayā rociṣmatī śubhā ||

तपोनुदा च ज्वाला च सुदीप्तिश्चांशुमालिनी । अप्रमेया त्रिधा सूक्ष्मा परा निर्वाणदायिनी ॥

taponudā ca jvālā ca sudīptiścāṃśumālinī | aprameyā tridhā sūkṣmā parā nirvāṇadāyinī ||

अवदाता सुशुद्धा च अमोघाख्या परम्परा । सन्धानकी शुद्धविद्या सर्वभूतमहेश्वरी ॥

avadātā suśuddhā ca amoghākhyā paramparā | sandhānakī śuddhavidyā sarvabhūtamaheśvarī ||

लक्ष्मीस्तुष्टिर्महाधीरा शान्तिरापूरणानवा । अनुग्रहा शक्तिराद्या जगज्ज्येष्ठा जगद्विधिः ॥

lakṣmīstuṣṭirmahādhīrā śāntirāpūraṇānavā | anugrahā śaktirādyā jagajjyeṣṭhā jagadvidhiḥ ||

सत्या प्रह्वा क्रिया योग्या अपर्णा ह्लादिनी शिवा । सम्पूर्णाह्लादिनी शुद्धा ज्योतिष्मत्यमृतावहा ॥

satyā prahvā kriyā yogyā aparṇā hlādinī śivā | sampūrṇāhlādinī śuddhā jyotiṣmatyamṛtāvahā ||

रजोवत्यर्कप्रतिभाऽऽकर्षिणी कर्षिणी रसा । परा वसुमती देवी कान्तिः शान्तिर्मतिः कला ॥

rajovatyarkapratibhā''karṣiṇī karṣiṇī rasā | parā vasumatī devī kāntiḥ śāntirmatiḥ kalā ||

कला कलङ्करहिता विशालोद्दीपनी रतिः । सम्बोधिनी हारिणी च प्रभावा भवभूतिदा ॥

kalā kalaṅkarahitā viśāloddīpanī ratiḥ | sambodhinī hāriṇī ca prabhāvā bhavabhūtidā ||

अमृतस्यन्दिनी जीवा जननी खण्डिका स्थिरा । धूमा कलावती पूर्णा भासुरा सुमतीरसा ॥

amṛtasyandinī jīvā jananī khaṇḍikā sthirā | dhūmā kalāvatī pūrṇā bhāsurā sumatīrasā ||

शुद्धा ध्वनिः सृतिः सृष्टिर्विकृतिः कृष्टिरेव च । प्रापणी प्राणदा प्रह्वा विश्वा पाण्डुरवासिनी ॥

śuddhā dhvaniḥ sṛtiḥ sṛṣṭirvikṛtiḥ kṛṣṭireva ca | prāpaṇī prāṇadā prahvā viśvā pāṇḍuravāsinī ||

अवनिर्वज्रनलिका चित्रा ब्रह्माण्डवासिनी । अनन्तरूपानन्तात्मानन्तस्थानन्तसम्भवा ॥

avanirvajranalikā citrā brahmāṇḍavāsinī | anantarūpānantātmānantasthānantasambhavā ||

महाशक्तिः प्राणशक्तिः प्राणदात्री ऋतम्भरा । महासमूहा निखिला इच्छाधारा सुखावहा ॥

mahāśaktiḥ prāṇaśaktiḥ prāṇadātrī ṛtambharā | mahāsamūhā nikhilā icchādhārā sukhāvahā ||

प्रत्यक्षलक्ष्मीर्निष्कम्पा प्ररोहाबुद्धिगोचरा । नानादेहा महावर्ता बहुदेहविकासिनी ॥

pratyakṣalakṣmīrniṣkampā prarohābuddhigocarā | nānādehā mahāvartā bahudehavikāsinī ||

सहस्राणी प्रधाना च न्यायवस्तुप्रकाशिका । सर्वाभिलाषपूर्णेच्छा सर्वा सर्वार्थभाषिणी ॥

sahasrāṇī pradhānā ca nyāyavastuprakāśikā | sarvābhilāṣapūrṇecchā sarvā sarvārthabhāṣiṇī ||

नानास्वरूपचिद्धात्री शब्दपूर्वा पुरातनी । व्यक्ताव्यक्ता जीवकेशा सर्वेच्छापरिपूरिता ॥

nānāsvarūpaciddhātrī śabdapūrvā purātanī | vyaktāvyaktā jīvakeśā sarvecchāparipūritā ||

सङ्कल्पसिद्धा साङ्ख्येया तत्त्वगर्भा धरावहा । भूतरूपा चित्स्वरूपा त्रिगुणा गुणगर्विता ॥

saṅkalpasiddhā sāṅkhyeyā tattvagarbhā dharāvahā | bhūtarūpā citsvarūpā triguṇā guṇagarvitā ||

प्रजापतीश्वरी रौद्री सर्वाधारा सुखावहा । कल्याणवाहिका कल्या कलिकल्मषनाशिनी ॥

prajāpatīśvarī raudrī sarvādhārā sukhāvahā | kalyāṇavāhikā kalyā kalikalmaṣanāśinī ||

नीरूपोद्भिन्नसन्ताना सुयन्त्रा त्रिगुणालया । महामाया योगमाया महायोगेश्वरी प्रिया ॥

nīrūpodbhinnasantānā suyantrā triguṇālayā | mahāmāyā yogamāyā mahāyogeśvarī priyā ||

महास्त्री विमला कीर्तिर्जया लक्ष्मीर्निरञ्जना । प्रकृतिर्भगवन्माया शक्तिर्निद्रा यशस्करी ॥

mahāstrī vimalā kīrtirjayā lakṣmīrnirañjanā | prakṛtirbhagavanmāyā śaktirnidrā yaśaskarī ||

चिन्ता बुद्धिर्यशः प्रज्ञा शान्तिः सुप्रीतिवर्द्धिनी । प्रद्युम्नमाता साध्वी च सुखसौभाग्यसिद्धिदा ॥

cintā buddhiryaśaḥ prajñā śāntiḥ suprītivarddhinī | pradyumnamātā sādhvī ca sukhasaubhāgyasiddhidā ||

काष्ठा निष्ठा प्रतिष्ठा च ज्येष्ठा श्रेष्ठा जयावहा । सर्वातिशायिनी प्रीतिर्विश्वशक्तिर्महाबला ॥

kāṣṭhā niṣṭhā pratiṣṭhā ca jyeṣṭhā śreṣṭhā jayāvahā | sarvātiśāyinī prītirviśvaśaktirmahābalā ||

वरिष्ठा विजया वीरा जयन्ती विजयप्रदा । हृद्गृहा गोपिनी गुह्या गणगन्धर्वसेविता ॥

variṣṭhā vijayā vīrā jayantī vijayapradā | hṛdgṛhā gopinī guhyā gaṇagandharvasevitā ||

योगीश्वरी योगमाया योगिनी योगसिद्धिदा । महायोगेश्वरवृता योगा योगेश्वरप्रिया ॥

yogīśvarī yogamāyā yoginī yogasiddhidā | mahāyogeśvaravṛtā yogā yogeśvarapriyā ||

ब्रह्मेन्द्ररुद्रनमिता सुरासुरवरप्रदा । त्रिवर्त्मगा त्रिलोकस्था त्रिविक्रमपदोद्भवा ॥

brahmendrarudranamitā surāsuravarapradā | trivartmagā trilokasthā trivikramapadodbhavā ||

सुतारा तारिणी तारा दुर्गा सन्तारिणी परा । सुतारिणी तारयन्ती भूरितारेश्वरप्रभा ॥

sutārā tāriṇī tārā durgā santāriṇī parā | sutāriṇī tārayantī bhūritāreśvaraprabhā ||

गुह्यविद्या यज्ञविद्या महाविद्या सुशोभिता । अध्यात्मविद्या विघ्नेशी पद्मस्था परमेष्ठिनी ॥

guhyavidyā yajñavidyā mahāvidyā suśobhitā | adhyātmavidyā vighneśī padmasthā parameṣṭhinī ||

आन्वीक्षिकी त्रयी वार्ता दण्डनीतिर्नयात्मिका । गौरी वागीश्वरी गोप्त्री गायत्री कमलोद्भवा ॥

ānvīkṣikī trayī vārtā daṇḍanītirnayātmikā | gaurī vāgīśvarī goptrī gāyatrī kamalodbhavā ||

विश्वम्भरा विश्वरूपा विश्वमाता वसुप्रदा । सिद्धिः स्वाहा स्वधा स्वस्तिः सुधा सर्वार्थसाधिनी ॥

viśvambharā viśvarūpā viśvamātā vasupradā | siddhiḥ svāhā svadhā svastiḥ sudhā sarvārthasādhinī ||

इच्छा सृष्टिर्द्युतिर्भूतिः कीर्तिः श्रद्धा दयामतिः । श्रुतिर्मेधा धृतिर्ह्रीः श्रीर्विद्या विबुधवन्दिता ॥

icchā sṛṣṭirdyutirbhūtiḥ kīrtiḥ śraddhā dayāmatiḥ | śrutirmedhā dhṛtirhrīḥ śrīrvidyā vibudhavanditā ||

अनसूया घृणा नीतिर्निर्वृतिः कामधुक्करा । प्रतिज्ञा सन्ततिर्भूतिर्द्यौः प्रज्ञा विश्वमानिनी ॥

anasūyā ghṛṇā nītirnirvṛtiḥ kāmadhukkarā | pratijñā santatirbhūtirdyauḥ prajñā viśvamāninī ||

स्मृतिर्वाग्विश्वजननी पश्यन्ती मध्यमा समा । सन्ध्या मेधा प्रभा भीमा सर्वाकारा सरस्वती ॥

smṛtirvāgviśvajananī paśyantī madhyamā samā | sandhyā medhā prabhā bhīmā sarvākārā sarasvatī ||

काङ्क्षा माया महामाया मोहिनी माधवप्रिया । सौम्याभोगा महाभोगा भोगिनी भोगदायिनी ॥

kāṅkṣā māyā mahāmāyā mohinī mādhavapriyā | saumyābhogā mahābhogā bhoginī bhogadāyinī ||

सुधौतकनकप्रख्या सुवर्णकमलासना । हिरण्यगर्भा सुश्रोणी हारिणी रमणी रमा ॥

sudhautakanakaprakhyā suvarṇakamalāsanā | hiraṇyagarbhā suśroṇī hāriṇī ramaṇī ramā ||

चन्द्रा हिरण्मयी ज्योत्स्ना रम्या शोभा शुभावहा । त्रैलोक्यमण्डना नारी नरेश्वरवरार्चिता ॥

candrā hiraṇmayī jyotsnā ramyā śobhā śubhāvahā | trailokyamaṇḍanā nārī nareśvaravarārcitā ||

त्रैलोक्यसुन्दरी रामा महाविभववाहिनी । पद्मस्था पद्मनिलया पद्ममालाविभूषिता ॥

trailokyasundarī rāmā mahāvibhavavāhinī | padmasthā padmanilayā padmamālāvibhūṣitā ||

पद्मयुग्मधरा कान्ता दिव्याभरणभूषिता । विचित्ररत्नमुकुटा विचित्राम्बरभूषणा ॥

padmayugmadharā kāntā divyābharaṇabhūṣitā | vicitraratnamukuṭā vicitrāmbarabhūṣaṇā ||

विचित्रमाल्यगन्धाढ्या विचित्रायुधवाहना । महानारायणी देवी वैष्णवी वीरवन्दिता ॥

vicitramālyagandhāḍhyā vicitrāyudhavāhanā | mahānārāyaṇī devī vaiṣṇavī vīravanditā ||

कालसङ्कर्षिणी घोरा तत्त्वसङ्कर्षिणीकला । जगत्सम्पूरणी विश्वा महाविभवभूषणा ॥

kālasaṅkarṣiṇī ghorā tattvasaṅkarṣiṇīkalā | jagatsampūraṇī viśvā mahāvibhavabhūṣaṇā ||

वारुणी वरदा व्याख्या घण्टाकर्णविराजिता । नृसिंही भैरवी ब्राह्मी भास्करी व्योमचारिणी ॥

vāruṇī varadā vyākhyā ghaṇṭākarṇavirājitā | nṛsiṃhī bhairavī brāhmī bhāskarī vyomacāriṇī ||

ऐन्द्री कामधेनुः सृष्टिः कामयोनिर्महाप्रभा । दृष्टा काम्या विश्वशक्तिर्बीजगत्यात्मदर्शना ॥

aindrī kāmadhenuḥ sṛṣṭiḥ kāmayonirmahāprabhā | dṛṣṭā kāmyā viśvaśaktirbījagatyātmadarśanā ||

गरुडारूढहृदया चान्द्री श्रीर्मधुरानना । महोग्ररूपा वाराही नारसिंही हतासुरा ॥

garuḍārūḍhahṛdayā cāndrī śrīrmadhurānanā | mahograrūpā vārāhī nārasiṃhī hatāsurā ||

युगान्तहुतभुग्ज्वाला कराला पिङ्गलाकला । त्रैलोक्यभूषणा भीमा श्यामा त्रैलोक्यमोहिनी ॥

yugāntahutabhugjvālā karālā piṅgalākalā | trailokyabhūṣaṇā bhīmā śyāmā trailokyamohinī ||

महोत्कटा महारक्ता महाचण्डा महासना । शङ्खिनी लेखिनी स्वस्था लिखिता खेचरेश्वरी ॥

mahotkaṭā mahāraktā mahācaṇḍā mahāsanā | śaṅkhinī lekhinī svasthā likhitā khecareśvarī ||

भद्रकाली चैकवीरा कौमारी भवमालिनी । कल्याणी कामधुग्ज्वालामुखी चोत्पलमालिका ॥

bhadrakālī caikavīrā kaumārī bhavamālinī | kalyāṇī kāmadhugjvālāmukhī cotpalamālikā ||

बालिका धनदा सूर्या हृदयोत्पलमालिका । अजिता वर्षिणी रीतिर्भरुण्डा गरुडासना ॥

bālikā dhanadā sūryā hṛdayotpalamālikā | ajitā varṣiṇī rītirbharuṇḍā garuḍāsanā ||

वैश्वानरी महामाया महाकाली विभीषणा । महामन्दारविभवा शिवानन्दा रतिप्रिया ॥

vaiśvānarī mahāmāyā mahākālī vibhīṣaṇā | mahāmandāravibhavā śivānandā ratipriyā ||

उद्रीतिः पद्ममाला च धर्मवेगा विभावनी । सत्क्रिया देवसेना च हिरण्यरजताश्रया ॥

udrītiḥ padmamālā ca dharmavegā vibhāvanī | satkriyā devasenā ca hiraṇyarajatāśrayā ||

सहसावर्तमाना च हस्तिनादप्रबोधिनी । हिरण्यपद्मवर्णा च हरिभद्रा सुदुर्द्धरा ॥

sahasāvartamānā ca hastinādaprabodhinī | hiraṇyapadmavarṇā ca haribhadrā sudurddharā ||

सूर्या हिरण्यप्रकटसदृशी हेममालिनी । पद्मानना नित्यपुष्टा देवमाता मृतोद्भवा ॥

sūryā hiraṇyaprakaṭasadṛśī hemamālinī | padmānanā nityapuṣṭā devamātā mṛtodbhavā ||

महाधना च या श‍ृङ्गी कर्द्दमी कम्बुकन्धरा । आदित्यवर्णा चन्द्राभा गन्धद्वारा दुरासदा ॥

mahādhanā ca yā śa‍ṛṅgī karddamī kambukandharā | ādityavarṇā candrābhā gandhadvārā durāsadā ||

वराचिता वरारोहा वरेण्या विष्णुवल्लभा । कल्याणी वरदा वामा वामेशी विन्ध्यवासिनी ॥

varācitā varārohā vareṇyā viṣṇuvallabhā | kalyāṇī varadā vāmā vāmeśī vindhyavāsinī ||

योगनिद्रा योगरता देवकी कामरूपिणी । कंसविद्राविणी दुर्गा कौमारी कौशिकी क्षमा ॥

yoganidrā yogaratā devakī kāmarūpiṇī | kaṃsavidrāviṇī durgā kaumārī kauśikī kṣamā ||

कात्यायनी कालरात्रिर्निशितृप्ता सुदुर्जया । विरूपाक्षी विशालाक्षी भक्तानांपरिरक्षिणी ॥

kātyāyanī kālarātrirniśitṛptā sudurjayā | virūpākṣī viśālākṣī bhaktānāṃparirakṣiṇī ||

बहुरूपा स्वरूपा च विरूपा रूपवर्जिता । घण्टानिनादबहुला जीमूतध्वनिनिःस्वना ॥

bahurūpā svarūpā ca virūpā rūpavarjitā | ghaṇṭāninādabahulā jīmūtadhvaniniḥsvanā ||

महादेवेन्द्रमथिनी भ्रुकुटीकुटिलानना । सत्योपयाचिता चैका कौबेरी ब्रह्मचारिणी ॥

mahādevendramathinī bhrukuṭīkuṭilānanā | satyopayācitā caikā kauberī brahmacāriṇī ||

आर्या यशोदा सुतदा धर्मकामार्थमोक्षदा । दारिद्र्यदुःखशमनी घोरदुर्गार्तिनाशिनी ॥

āryā yaśodā sutadā dharmakāmārthamokṣadā | dāridryaduḥkhaśamanī ghoradurgārtināśinī ||

भक्तार्तिशमनी भव्या भवभर्गापहारिणी । क्षीराब्धितनया पद्मा कमला धरणीधरा ॥

bhaktārtiśamanī bhavyā bhavabhargāpahāriṇī | kṣīrābdhitanayā padmā kamalā dharaṇīdharā ||

रुक्मिणी रोहिणी सीता सत्यभामा यशस्विनी । प्रज्ञाधारामितप्रज्ञा वेदमाता यशोवती ॥

rukmiṇī rohiṇī sītā satyabhāmā yaśasvinī | prajñādhārāmitaprajñā vedamātā yaśovatī ||

समाधिर्भावना मैत्री करुणा भक्तवत्सला । अन्तर्वेदी दक्षिणा च ब्रह्मचर्यपरागतिः ॥

samādhirbhāvanā maitrī karuṇā bhaktavatsalā | antarvedī dakṣiṇā ca brahmacaryaparāgatiḥ ||

दीक्षा वीक्षा परीक्षा च समीक्षा वीरवत्सला । अम्बिका सुरभिः सिद्धा सिद्धविद्याधरार्चिता ॥

dīkṣā vīkṣā parīkṣā ca samīkṣā vīravatsalā | ambikā surabhiḥ siddhā siddhavidyādharārcitā ||

सुदीक्षा लेलिहाना च कराला विश्वपूरका । विश्वसन्धारिणी दीप्तिस्तापनी ताण्डवप्रिया ॥

sudīkṣā lelihānā ca karālā viśvapūrakā | viśvasandhāriṇī dīptistāpanī tāṇḍavapriyā ||

उद्भवा विरजा राज्ञी तापनी बिन्दुमालिनी । क्षीरधारासुप्रभावा लोकमाता सुवर्चसा ॥

udbhavā virajā rājñī tāpanī bindumālinī | kṣīradhārāsuprabhāvā lokamātā suvarcasā ||

हव्यगर्भा चाज्यगर्भा जुह्वतोयज्ञसम्भवा । आप्यायनी पावनी च दहनी दहनाश्रया ॥

havyagarbhā cājyagarbhā juhvatoyajñasambhavā | āpyāyanī pāvanī ca dahanī dahanāśrayā ||

मातृका माधवी मुख्या मोक्षलक्ष्मीर्महर्द्धिदा । सर्वकामप्रदा भद्रा सुभद्रा सर्वमङ्गला ॥

mātṛkā mādhavī mukhyā mokṣalakṣmīrmaharddhidā | sarvakāmapradā bhadrā subhadrā sarvamaṅgalā ||

श्वेता सुशुक्लवसना शुक्लमाल्यानुलेपना । हंसा हीनकरी हंसी हृद्या हृत्कमलालया ॥

śvetā suśuklavasanā śuklamālyānulepanā | haṃsā hīnakarī haṃsī hṛdyā hṛtkamalālayā ||

सितातपत्रा सुश्रोणी पद्मपत्रायतेक्षणा । सावित्री सत्यसङ्कल्पा कामदा कामकामिनी ॥

sitātapatrā suśroṇī padmapatrāyatekṣaṇā | sāvitrī satyasaṅkalpā kāmadā kāmakāminī ||

दर्शनीया दृशा दृश्या स्पृश्या सेव्या वराङ्गना । भोगप्रिया भोगवती भोगीन्द्रशयनासना ॥

darśanīyā dṛśā dṛśyā spṛśyā sevyā varāṅganā | bhogapriyā bhogavatī bhogīndraśayanāsanā ||

आर्द्रा पुष्करिणी पुण्या पावनी पापसूदनी । श्रीमती च शुभाकारा परमैश्वर्यभूतिदा ॥

ārdrā puṣkariṇī puṇyā pāvanī pāpasūdanī | śrīmatī ca śubhākārā paramaiśvaryabhūtidā ||

अचिन्त्यानन्तविभवा भवभावविभावनी । निश्रेणिः सर्वदेहस्था सर्वभूतनमस्कृता ॥

acintyānantavibhavā bhavabhāvavibhāvanī | niśreṇiḥ sarvadehasthā sarvabhūtanamaskṛtā ||

बला बलाधिका देवी गौतमी गोकुलालया । तोषिणी पूर्णचन्द्राभा एकानन्दा शतानना ॥

balā balādhikā devī gautamī gokulālayā | toṣiṇī pūrṇacandrābhā ekānandā śatānanā ||

उद्याननगरद्वारहर्म्योपवनवासिनी । कूष्माण्डा दारुणा चण्डा किराती नन्दनालया ॥

udyānanagaradvāraharmyopavanavāsinī | kūṣmāṇḍā dāruṇā caṇḍā kirātī nandanālayā ||

कालायना कालगम्या भयदा भयनाशिनी । सौदामनी मेघरवा दैत्यदानवमर्दिनी ॥

kālāyanā kālagamyā bhayadā bhayanāśinī | saudāmanī megharavā daityadānavamardinī ||

जगन्माता भयकरी भूतधात्री सुदुर्लभा । काश्यपी शुभदाता च वनमाला शुभावरा ॥

jaganmātā bhayakarī bhūtadhātrī sudurlabhā | kāśyapī śubhadātā ca vanamālā śubhāvarā ||

धन्या धन्येश्वरी धन्या रत्नदा वसुवर्द्धिनी । गान्धर्वी रेवती गङ्गा शकुनी विमलानना ॥

dhanyā dhanyeśvarī dhanyā ratnadā vasuvarddhinī | gāndharvī revatī gaṅgā śakunī vimalānanā ||

इडा शान्तिकरी चैव तामसी कमलालया । आज्यपा वज्रकौमारी सोमपा कुसुमाश्रया ॥

iḍā śāntikarī caiva tāmasī kamalālayā | ājyapā vajrakaumārī somapā kusumāśrayā ||

जगत्प्रिया च सरथा दुर्जया खगवाहना । मनोभवा कामचारा सिद्धचारणसेविता ॥

jagatpriyā ca sarathā durjayā khagavāhanā | manobhavā kāmacārā siddhacāraṇasevitā ||

व्योमलक्ष्मीर्महालक्ष्मीस्तेजोलक्ष्मीः सुजाज्वला । रसलक्ष्मीर्जगद्योनिर्गन्धलक्ष्मीर्वनाश्रया ॥

vyomalakṣmīrmahālakṣmīstejolakṣmīḥ sujājvalā | rasalakṣmīrjagadyonirgandhalakṣmīrvanāśrayā ||

श्रवणा श्रावणी नेत्री रसनाप्राणचारिणी । विरिञ्चिमाता विभवा वरवारिजवाहना ॥

śravaṇā śrāvaṇī netrī rasanāprāṇacāriṇī | viriñcimātā vibhavā varavārijavāhanā ||

वीर्या वीरेश्वरी वन्द्या विशोका वसुवर्द्धिनी । अनाहता कुण्डलिनी नलिनी वनवासिनी ॥

vīryā vīreśvarī vandyā viśokā vasuvarddhinī | anāhatā kuṇḍalinī nalinī vanavāsinī ||

गान्धारिणीन्द्रनमिता सुरेन्द्रनमिता सती । सर्वमङ्गल्यमाङ्गल्या सर्वकामसमृद्धिदा ॥

gāndhāriṇīndranamitā surendranamitā satī | sarvamaṅgalyamāṅgalyā sarvakāmasamṛddhidā ||

सर्वानन्दा महानन्दा सत्कीर्तिः सिद्धसेविता । सिनीवाली कुहू राका अमा चानुमतिर्द्युतिः ॥

sarvānandā mahānandā satkīrtiḥ siddhasevitā | sinīvālī kuhū rākā amā cānumatirdyutiḥ ||

अरुन्धती वसुमती भार्गवी वास्तुदेवता । मायूरी वज्रवेताली वज्रहस्ता वरानना ॥

arundhatī vasumatī bhārgavī vāstudevatā | māyūrī vajravetālī vajrahastā varānanā ||

अनघा धरणिर्धीरा धमनी मणिभूषणा । राजश्री रूपसहिता ब्रह्मश्रीर्ब्रह्मवन्दिता ॥

anaghā dharaṇirdhīrā dhamanī maṇibhūṣaṇā | rājaśrī rūpasahitā brahmaśrīrbrahmavanditā ||

जयश्रीर्जयदा ज्ञेया सर्गश्रीः स्वर्गतिः सताम् । सुपुष्पा पुष्पनिलया फलश्रीर्निष्कलप्रिया ॥

jayaśrīrjayadā jñeyā sargaśrīḥ svargatiḥ satām | supuṣpā puṣpanilayā phalaśrīrniṣkalapriyā ||

धनुर्लक्ष्मीस्त्वमिलिता परक्रोधनिवारिणी । कद्रूर्द्धनायुः कपिला सुरसा सुरमोहिनी ॥

dhanurlakṣmīstvamilitā parakrodhanivāriṇī | kadrūrddhanāyuḥ kapilā surasā suramohinī ||

महाश्वेता महानीला महामूर्तिर्विषापहा । सुप्रभा ज्वालिनी दीप्तिस्तृप्तिर्व्याप्तिः प्रभाकरी ॥

mahāśvetā mahānīlā mahāmūrtirviṣāpahā | suprabhā jvālinī dīptistṛptirvyāptiḥ prabhākarī ||

तेजोवती पद्मबोधा मदलेखारुणावती । रत्ना रत्नावली भूता शतधामा शतापहा ॥

tejovatī padmabodhā madalekhāruṇāvatī | ratnā ratnāvalī bhūtā śatadhāmā śatāpahā ||

त्रिगुणा घोषिणी रक्ष्या नर्द्दिनी घोषवर्जिता । साध्या दितिर्दितिदेवी मृगवाहा मृगाङ्कगा ॥

triguṇā ghoṣiṇī rakṣyā narddinī ghoṣavarjitā | sādhyā ditirditidevī mṛgavāhā mṛgāṅkagā ||

चित्रनीलोत्पलगता वृषरत्नकराश्रया । हिरण्यरजतद्वन्द्वा शङ्खभद्रासनास्थिता ॥

citranīlotpalagatā vṛṣaratnakarāśrayā | hiraṇyarajatadvandvā śaṅkhabhadrāsanāsthitā ||

गोमूत्रगोमयक्षीरदधिसर्पिर्जलाश्रया । मरीचिश्चीरवसना पूर्णा चन्द्रार्कविष्टरा ॥

gomūtragomayakṣīradadhisarpirjalāśrayā | marīciścīravasanā pūrṇā candrārkaviṣṭarā ||

सुसूक्ष्मा निर्वृतिः स्थूला निवृत्तारातिरेव च । मरीचिज्वालिनी धूम्रा हव्यवाहा हिरण्यदा ॥

susūkṣmā nirvṛtiḥ sthūlā nivṛttārātireva ca | marīcijvālinī dhūmrā havyavāhā hiraṇyadā ||

दायिनी कालिनी सिद्धिः शोषिणी सम्प्रबोधिनी । भास्वरा संहतिस्तीक्ष्णा प्रचण्डज्वलनोज्ज्वला ॥

dāyinī kālinī siddhiḥ śoṣiṇī samprabodhinī | bhāsvarā saṃhatistīkṣṇā pracaṇḍajvalanojjvalā ||

साङ्गा प्रचण्डा दीप्ता च वैद्युतिः सुमहाद्युतिः । कपिला नीलरक्ता च सुषुम्णा विस्फुलिङ्गिनी ॥

sāṅgā pracaṇḍā dīptā ca vaidyutiḥ sumahādyutiḥ | kapilā nīlaraktā ca suṣumṇā visphuliṅginī ||

अर्चिष्मती रिपुहरा दीर्घा धूमावली जरा । सम्पूर्णमण्डला पूषा स्रंसिनी सुमनोहरा ॥

arciṣmatī ripuharā dīrghā dhūmāvalī jarā | sampūrṇamaṇḍalā pūṣā sraṃsinī sumanoharā ||

जया पुष्टिकरीच्छाया मानसा हृदयोज्ज्वला । सुवर्णकरणी श्रेष्ठा मृतसञ्जीविनीरणे ॥

jayā puṣṭikarīcchāyā mānasā hṛdayojjvalā | suvarṇakaraṇī śreṣṭhā mṛtasañjīvinīraṇe ||

विशल्यकरणी शुभ्रा सन्धिनी परमौषधिः । ब्रह्मिष्ठा ब्रह्मसहिता ऐन्दवी रत्नसम्भवा ॥

viśalyakaraṇī śubhrā sandhinī paramauṣadhiḥ | brahmiṣṭhā brahmasahitā aindavī ratnasambhavā ||

विद्युत्प्रभा बिन्दुमती त्रिस्वभावगुणाम्बिका । नित्योदिता नित्यहृष्टा नित्यकामकरीषिणी ॥

vidyutprabhā bindumatī trisvabhāvaguṇāmbikā | nityoditā nityahṛṣṭā nityakāmakarīṣiṇī ||

पद्माङ्का वज्रचिह्ना च वक्रदण्डविभासिनी । विदेहपूजिता कन्या माया विजयवाहिनी ॥

padmāṅkā vajracihnā ca vakradaṇḍavibhāsinī | videhapūjitā kanyā māyā vijayavāhinī ||

मानिनी मङ्गला मान्या मालिनी मानदायिनी । विश्वेश्वरी गणवती मण्डला मण्डलेश्वरी ॥

māninī maṅgalā mānyā mālinī mānadāyinī | viśveśvarī gaṇavatī maṇḍalā maṇḍaleśvarī ||

हरिप्रिया भौमसुता मनोज्ञा मतिदायिनी । प्रत्यङ्गिरा सोमगुप्ता मनोऽभिज्ञा वदन्मतिः ॥

haripriyā bhaumasutā manojñā matidāyinī | pratyaṅgirā somaguptā mano'bhijñā vadanmatiḥ ||

यशोधरा रत्नमाला कृष्णा त्रैलोक्यबन्धनी । अमृता धारिणी हर्षा विनता वल्लकी शची ॥

yaśodharā ratnamālā kṛṣṇā trailokyabandhanī | amṛtā dhāriṇī harṣā vinatā vallakī śacī ||

सङ्कल्पा भामिनी मिश्रा कादम्बर्यमृतप्रभा । अगता निर्गता वज्रा सुहिता संहिताक्षता ॥

saṅkalpā bhāminī miśrā kādambaryamṛtaprabhā | agatā nirgatā vajrā suhitā saṃhitākṣatā ||

सर्वार्थसाधनकरी धातुर्धारणिकामला । करुणाधारसम्भूता कमलाक्षी शशिप्रिया ॥

sarvārthasādhanakarī dhāturdhāraṇikāmalā | karuṇādhārasambhūtā kamalākṣī śaśipriyā ||

सौम्यरूपा महादीप्ता महाज्वाला विकाशिनी । माला काञ्चनमाला च सद्वज्रा कनकप्रभा ॥

saumyarūpā mahādīptā mahājvālā vikāśinī | mālā kāñcanamālā ca sadvajrā kanakaprabhā ||

प्रक्रिया परमा योक्त्री क्षोभिका च सुखोदया । विजृम्भणा च वज्राख्या श‍ृङ्खला कमलेक्षणा ॥

prakriyā paramā yoktrī kṣobhikā ca sukhodayā | vijṛmbhaṇā ca vajrākhyā śa‍ṛṅkhalā kamalekṣaṇā ||

जयङ्करी मधुमती हरिता शशिनी शिवा । मूलप्रकृतिरीशानी योगमाता मनोजवा ॥

jayaṅkarī madhumatī haritā śaśinī śivā | mūlaprakṛtirīśānī yogamātā manojavā ||

धर्मोदया भानुमती सर्वाभासा सुखावहा । धुरन्धरा च बाला च धर्मसेव्या तथागता ॥

dharmodayā bhānumatī sarvābhāsā sukhāvahā | dhurandharā ca bālā ca dharmasevyā tathāgatā ||

सुकुमारा सौम्यमुखी सौम्यसम्बोधनोत्तमा । सुमुखी सर्वतोभद्रा गुह्यशक्तिर्गुहालया ॥

sukumārā saumyamukhī saumyasambodhanottamā | sumukhī sarvatobhadrā guhyaśaktirguhālayā ||

हलायुधा चैकवीरा सर्वशस्त्रसुधारिणी । व्योमशक्तिर्महादेहा व्योमगा मधुमन्मयी ॥

halāyudhā caikavīrā sarvaśastrasudhāriṇī | vyomaśaktirmahādehā vyomagā madhumanmayī ||

गङ्गा वितस्ता यमुना चन्द्रभागा सरस्वती । तिलोत्तमोर्वशी रम्भा स्वामिनी सुरसुन्दरी ॥

gaṅgā vitastā yamunā candrabhāgā sarasvatī | tilottamorvaśī rambhā svāminī surasundarī ||

बाणप्रहरणावाला बिम्बोष्ठी चारुहासिनी । ककुद्मिनी चारुपृष्ठा दृष्टादृष्टफलप्रदा ॥

bāṇapraharaṇāvālā bimboṣṭhī cāruhāsinī | kakudminī cārupṛṣṭhā dṛṣṭādṛṣṭaphalapradā ||

काम्याचरी च काम्या च कामाचारविहारिणी । हिमशैलेन्द्रसङ्काशा गजेन्द्रवरवाहना ॥

kāmyācarī ca kāmyā ca kāmācāravihāriṇī | himaśailendrasaṅkāśā gajendravaravāhanā ||

अशेषसुखसौभाग्यसम्पदा योनिरुत्तमा । सर्वोत्कृष्टा सर्वमयी सर्वा सर्वेश्वरप्रिया ॥

aśeṣasukhasaubhāgyasampadā yoniruttamā | sarvotkṛṣṭā sarvamayī sarvā sarveśvarapriyā ||

सर्वाङ्गयोनिः साव्यक्ता सम्प्रधानेश्वरेश्वरी । विष्णुवक्षःस्थलगता किमतः परमुच्यते ॥

sarvāṅgayoniḥ sāvyaktā sampradhāneśvareśvarī | viṣṇuvakṣaḥsthalagatā kimataḥ paramucyate ||

परा निर्महिमा देवी हरिवक्षःस्थलाश्रया । सा देवी पापहन्त्री च सान्निध्यं कुरुतान्मम ॥

parā nirmahimā devī harivakṣaḥsthalāśrayā | sā devī pāpahantrī ca sānnidhyaṃ kurutānmama ||

इति नाम्नां सहस्रं तु लक्ष्म्याः प्रोक्तं शुभावहम् । परावरेण भेदेन मुख्यगौणेन भागतः ॥

iti nāmnāṃ sahasraṃ tu lakṣmyāḥ proktaṃ śubhāvaham | parāvareṇa bhedena mukhyagauṇena bhāgataḥ ||

यश्चैतत् कीर्तयेन्नित्यं श‍ृणुयाद् वापि पद्मज । शुचिः समाहितो भूत्वा भक्तिश्रद्धासमन्वितः ॥

yaścaitat kīrtayennityaṃ śa‍ṛṇuyād vāpi padmaja | śuciḥ samāhito bhūtvā bhaktiśraddhāsamanvitaḥ ||

श्रीनिवासं समभ्यर्च्य पुष्पधूपानुलेपनैः । भोगैश्च मधुपर्काद्यैर्यथाशक्ति जगद्गुरुम् ॥

śrīnivāsaṃ samabhyarcya puṣpadhūpānulepanaiḥ | bhogaiśca madhuparkādyairyathāśakti jagadgurum ||

तत्पार्श्वस्थां श्रियं देवीं सम्पूज्य श्रीधरप्रियाम् । ततो नामसहस्रोण तोषयेत् परमेश्वरीम् ॥

tatpārśvasthāṃ śriyaṃ devīṃ sampūjya śrīdharapriyām | tato nāmasahasroṇa toṣayet parameśvarīm ||

नामरत्नावलीस्तोत्रमिदं यः सततं पठेत् । प्रसादाभिमुखीलक्ष्मीः सर्वं तस्मै प्रयच्छति ॥

nāmaratnāvalīstotramidaṃ yaḥ satataṃ paṭhet | prasādābhimukhīlakṣmīḥ sarvaṃ tasmai prayacchati ||

यस्या लक्ष्म्याश्च सम्भूताः शक्तयो विश्वगाः सदा । कारणत्वे न तिष्ठन्ति जगत्यस्मिंश्चराचरे ॥

yasyā lakṣmyāśca sambhūtāḥ śaktayo viśvagāḥ sadā | kāraṇatve na tiṣṭhanti jagatyasmiṃścarācare ||

तस्मात् प्रीता जगन्माता श्रीर्यस्याच्युतवल्लभा । सुप्रीताः शक्तयस्तस्य सिद्धिमिष्टां दिशन्ति हि ॥

tasmāt prītā jaganmātā śrīryasyācyutavallabhā | suprītāḥ śaktayastasya siddhimiṣṭāṃ diśanti hi ||

एक एव जगत्स्वामी शक्तिमानच्युतः प्रभुः । तदंशशक्तिमन्तोऽन्ये ब्रह्मेशानादयो यथा ॥

eka eva jagatsvāmī śaktimānacyutaḥ prabhuḥ | tadaṃśaśaktimanto'nye brahmeśānādayo yathā ||

तथैवैका परा शक्तिः श्रीस्तस्य करुणाश्रया । ज्ञानादिषाङ्गुण्यमयी या प्रोक्ता प्रकृतिः परा ॥

tathaivaikā parā śaktiḥ śrīstasya karuṇāśrayā | jñānādiṣāṅguṇyamayī yā proktā prakṛtiḥ parā ||

एकैव शक्तिः श्रीस्तस्या द्वितीयात्मनि वर्तते । परा परेशी सर्वेशी सर्वाकारा सनातनी ॥

ekaiva śaktiḥ śrīstasyā dvitīyātmani vartate | parā pareśī sarveśī sarvākārā sanātanī ||

अनन्तनामधेया च शक्तिचक्रस्य नायिका । जगच्चराचरमिदं सर्वं व्याप्य व्यवस्थिता ॥

anantanāmadheyā ca śakticakrasya nāyikā | jagaccarācaramidaṃ sarvaṃ vyāpya vyavasthitā ||

तस्मादेकैव परमा श्रीर्ज्ञेया विश्वरूपिणी । सौम्या सौम्येन रूपेण संस्थिता नटजीववत् ॥

tasmādekaiva paramā śrīrjñeyā viśvarūpiṇī | saumyā saumyena rūpeṇa saṃsthitā naṭajīvavat ||

यो यो जगति पुम्भावः स विष्णुरिति निश्चयः । या या तु नारीभावस्था तत्र लक्ष्मीर्व्यवस्थिता ॥

yo yo jagati pumbhāvaḥ sa viṣṇuriti niścayaḥ | yā yā tu nārībhāvasthā tatra lakṣmīrvyavasthitā ||

प्रकृतेः पुरुषाच्चान्यस्तृतीयो नैव विद्यते । अथ किं बहुनोक्तेन नरनारीमयो हरिः ॥

prakṛteḥ puruṣāccānyastṛtīyo naiva vidyate | atha kiṃ bahunoktena naranārīmayo hariḥ ||

अनेकभेदभिन्नस्तु क्रियते परमेश्वरः । महाविभूतिं दयितां ये स्तुवन्त्यच्युतप्रियाम् ॥

anekabhedabhinnastu kriyate parameśvaraḥ | mahāvibhūtiṃ dayitāṃ ye stuvantyacyutapriyām ||

ते प्राप्नुवन्ति परमां लक्ष्मीं संशुद्धचेतसः । पद्मयोनिरिदं प्राप्य पठन् स्तोत्रमिदं क्रमात् ॥

te prāpnuvanti paramāṃ lakṣmīṃ saṃśuddhacetasaḥ | padmayoniridaṃ prāpya paṭhan stotramidaṃ kramāt ||

दिव्यमष्टगुणैश्वर्यं तत्प्रसादाच्च लब्धवान् । सकामानां च फलदामकामानां च मोक्षदाम् ॥

divyamaṣṭaguṇaiśvaryaṃ tatprasādācca labdhavān | sakāmānāṃ ca phaladāmakāmānāṃ ca mokṣadām ||

पुस्तकाख्यां भयत्रात्रीं सितवस्त्रां त्रिलोचनाम् । महापद्मनिषण्णां तां लक्ष्मीमजरतां नमः ॥

pustakākhyāṃ bhayatrātrīṃ sitavastrāṃ trilocanām | mahāpadmaniṣaṇṇāṃ tāṃ lakṣmīmajaratāṃ namaḥ ||

करयुगलगृहीतं पूर्णकुम्भं दधाना क्वचिदमलगतस्था शङ्खपद्माक्षपाणिः । क्वचिदपि दयिताङ्गे चामरव्यग्रहस्ता क्वचिदपि सृणिपाशं बिभ्रती हेमकान्तिः ॥

karayugalagṛhītaṃ pūrṇakumbhaṃ dadhānā kvacidamalagatasthā śaṅkhapadmākṣapāṇiḥ | kvacidapi dayitāṅge cāmaravyagrahastā kvacidapi sṛṇipāśaṃ bibhratī hemakāntiḥ ||

॥ इत्यादिपद्मपुराणे काश्मीरवर्णने हिरण्यगर्भहृदये सर्वकामप्रदायकं पुरुषोत्तमप्रोक्तं श्रीलक्ष्मीसहस्रनामस्तोत्रं समाप्तम् ॥

|| ityādipadmapurāṇe kāśmīravarṇane hiraṇyagarbhahṛdaye sarvakāmapradāyakaṃ puruṣottamaproktaṃ śrīlakṣmīsahasranāmastotraṃ samāptam ||