श्रीपार्वतीसहस्रनामस्तोत्रम्

हिमवानुवाच । का त्वं देवि विशालाक्षि शशाङ्कावयवाङ्किते । न जाने त्वामहं वत्से यथावद् ब्रूहि पृच्छते ॥

himavānuvāca | kā tvaṃ devi viśālākṣi śaśāṅkāvayavāṅkite | na jāne tvāmahaṃ vatse yathāvad brūhi pṛcchate ||

गिरीन्द्रवचनं श्रुत्वा ततः सा परमेश्वरी । व्याजहार महाशैलं योगिनामभयप्रदा ॥

girīndravacanaṃ śrutvā tataḥ sā parameśvarī | vyājahāra mahāśailaṃ yogināmabhayapradā ||

देव्युवाच । मां विद्धि परमां शक्तिं परमेश्वरसमाश्रयाम् । अनन्यामव्ययामेकां यां पश्यन्ति मुमुक्षवः ॥

devyuvāca | māṃ viddhi paramāṃ śaktiṃ parameśvarasamāśrayām | ananyāmavyayāmekāṃ yāṃ paśyanti mumukṣavaḥ ||

अहं वै सर्वभावानामात्मा सर्वान्तरा शिवा । शाश्वतैश्वर्यविज्ञानमूर्तिः सर्वप्रवर्तिका ॥

ahaṃ vai sarvabhāvānāmātmā sarvāntarā śivā | śāśvataiśvaryavijñānamūrtiḥ sarvapravartikā ||

अनन्ताऽनन्तमहिमा संसारार्णवतारिणी । दिव्यं ददामि ते चक्षुः पश्य मे रूपमैश्वरम् ॥

anantā'nantamahimā saṃsārārṇavatāriṇī | divyaṃ dadāmi te cakṣuḥ paśya me rūpamaiśvaram ||

एतावदुक्त्वा विज्ञानं दत्त्वा हिमवते स्वयम् । स्वं रूपं दर्शयामास दिव्यं तत् पारमेश्वरम् ॥

etāvaduktvā vijñānaṃ dattvā himavate svayam | svaṃ rūpaṃ darśayāmāsa divyaṃ tat pārameśvaram ||

कोटिसूर्यप्रतीकाशं तेजोबिम्बं निराकुलम् । ज्वालामालासहस्राढ्यं कालानलशतोपमम् ॥

koṭisūryapratīkāśaṃ tejobimbaṃ nirākulam | jvālāmālāsahasrāḍhyaṃ kālānalaśatopamam ||

दंष्ट्राकरालं दुर्धर्षं जटामण्डलमण्डितम् । त्रिशूलवरहस्तं च घोररूपं भयानकम् ॥

daṃṣṭrākarālaṃ durdharṣaṃ jaṭāmaṇḍalamaṇḍitam | triśūlavarahastaṃ ca ghorarūpaṃ bhayānakam ||

प्रशान्तं सौम्यवदनमनन्ताश्चर्यसंयुतम् । चन्द्रावयवलक्ष्माणं चन्द्रकोटिसमप्रभम् ॥

praśāntaṃ saumyavadanamanantāścaryasaṃyutam | candrāvayavalakṣmāṇaṃ candrakoṭisamaprabham ||

किरीटिनं गदाहस्तं नूपुरैरुपशोभितम् । दिव्यमाल्याम्बरधरं दिव्यगन्धानुलेपनम् ॥

kirīṭinaṃ gadāhastaṃ nūpurairupaśobhitam | divyamālyāmbaradharaṃ divyagandhānulepanam ||

शङ्खचक्रधरं काम्यं त्रिनेत्रं कृत्तिवाससम् । अण्डस्थं चाण्डबाह्यस्थं बाह्यमाभ्यन्तरं परम् ॥

śaṅkhacakradharaṃ kāmyaṃ trinetraṃ kṛttivāsasam | aṇḍasthaṃ cāṇḍabāhyasthaṃ bāhyamābhyantaraṃ param ||

सर्वशक्तिमयं शुभ्रं सर्वाकारं सनातनम् । ब्रह्मेन्द्रोपेन्द्रयोगीन्द्रैर्वन्द्यमानपदाम्बुजम् ॥

sarvaśaktimayaṃ śubhraṃ sarvākāraṃ sanātanam | brahmendropendrayogīndrairvandyamānapadāmbujam ||

सर्वतः पाणिपादान्तं सर्वतोऽक्षिशिरोमुखम् । सर्वमावृत्य तिष्ठन्तं ददर्श परमेश्वरम् ॥

sarvataḥ pāṇipādāntaṃ sarvato'kṣiśiromukham | sarvamāvṛtya tiṣṭhantaṃ dadarśa parameśvaram ||

दृष्ट्वा तदीदृशं रूपं देव्या माहेश्वरं परम् । भयेन च समाविष्टः स राजा हृष्टमानसः ॥

dṛṣṭvā tadīdṛśaṃ rūpaṃ devyā māheśvaraṃ param | bhayena ca samāviṣṭaḥ sa rājā hṛṣṭamānasaḥ ||

आत्मन्याधाय चात्मानमोङ्कारं समनुस्मरन् । नाम्नामष्टसहस्रेण तुष्टाव परमेश्वरीम् ॥

ātmanyādhāya cātmānamoṅkāraṃ samanusmaran | nāmnāmaṣṭasahasreṇa tuṣṭāva parameśvarīm ||

हिमवानुवाच । ॐ शिवोमा परमा शक्तिरनन्ता निष्कलाऽमला । शान्ता माहेश्वरी नित्या शाश्वती परमाक्षरा ॥

himavānuvāca | oṃ śivomā paramā śaktiranantā niṣkalā'malā | śāntā māheśvarī nityā śāśvatī paramākṣarā ||

अचिन्त्या केवलाऽनन्त्या शिवात्मा परमात्मिका । अनादिरव्यया शुद्धा देवात्मा सर्वगाऽचला ॥

acintyā kevalā'nantyā śivātmā paramātmikā | anādiravyayā śuddhā devātmā sarvagā'calā ||

एकानेकविभागस्था मायातीता सुनिर्मला । महामाहेश्वरी सत्या महादेवी निरञ्जना ॥

ekānekavibhāgasthā māyātītā sunirmalā | mahāmāheśvarī satyā mahādevī nirañjanā ||

काष्ठा सर्वान्तरस्था च चिच्छक्तिरतिलालसा । नन्दा सर्वात्मिका विद्या ज्योतीरूपाऽमृताक्षरा ॥

kāṣṭhā sarvāntarasthā ca cicchaktiratilālasā | nandā sarvātmikā vidyā jyotīrūpā'mṛtākṣarā ||

शान्तिः प्रतिष्ठा सर्वेषां निवृत्तिरमृतप्रदा । व्योममूर्तिर्व्योमलया व्योमाधाराऽच्युताऽमरा ॥

śāntiḥ pratiṣṭhā sarveṣāṃ nivṛttiramṛtapradā | vyomamūrtirvyomalayā vyomādhārā'cyutā'marā ||

अनादिनिधनाऽमोघा कारणात्मा कलाऽकला । क्रतुः प्रथमजा नाभिरमृतस्यात्मसंश्रया ॥

anādinidhanā'moghā kāraṇātmā kalā'kalā | kratuḥ prathamajā nābhiramṛtasyātmasaṃśrayā ||

प्राणेश्वरप्रिया माता महामहिषघातिनी । प्राणेश्वरी प्राणरूपा प्रधानपुरुषेश्वरी ॥

prāṇeśvarapriyā mātā mahāmahiṣaghātinī | prāṇeśvarī prāṇarūpā pradhānapuruṣeśvarī ||

सर्वशक्तिकलाकारा ज्योत्स्ना द्यौर्महिमास्पदा । सर्वकार्यनियन्त्री च सर्वभूतेश्वरेश्वरी ॥

sarvaśaktikalākārā jyotsnā dyaurmahimāspadā | sarvakāryaniyantrī ca sarvabhūteśvareśvarī ||

अनादिरव्यक्तगुहा महानन्दा सनातनी । आकाशयोनिर्योगस्था महायोगेश्वरेश्वरी ॥

anādiravyaktaguhā mahānandā sanātanī | ākāśayoniryogasthā mahāyogeśvareśvarī ||

महामाया सुदुष्पूरा मूलप्रकृतिरीश्वरी । संसारयोनिः सकला सर्वशक्तिसमुद्भवा ॥

mahāmāyā suduṣpūrā mūlaprakṛtirīśvarī | saṃsārayoniḥ sakalā sarvaśaktisamudbhavā ||

संसारपारा दुर्वारा दुर्निरीक्ष्या दुरासदा । प्राणशक्तिः प्राणविद्या योगिनी परमा कला ॥

saṃsārapārā durvārā durnirīkṣyā durāsadā | prāṇaśaktiḥ prāṇavidyā yoginī paramā kalā ||

महाविभूतिर्दुर्धर्षा मूलप्रकृतिसंभवा । अनाद्यनन्तविभवा परार्था पुरुषारणिः ॥

mahāvibhūtirdurdharṣā mūlaprakṛtisaṃbhavā | anādyanantavibhavā parārthā puruṣāraṇiḥ ||

सर्गस्थित्यन्तकरणी सुदुर्वाच्या दुरत्यया । शब्दयोनिः शब्दमयी नादाख्या नादविग्रहा ॥

sargasthityantakaraṇī sudurvācyā duratyayā | śabdayoniḥ śabdamayī nādākhyā nādavigrahā ||

प्रधानपुरुषातीता प्रधानपुरुषात्मिका । पुराणी चिन्मयी पुंसामादिः पुरुषरूपिणी ॥

pradhānapuruṣātītā pradhānapuruṣātmikā | purāṇī cinmayī puṃsāmādiḥ puruṣarūpiṇī ||

भूतान्तरात्मा कूटस्था महापुरुषसंज्ञिता । जन्ममृत्युजरातीता सर्वशक्तिसमन्विता ॥

bhūtāntarātmā kūṭasthā mahāpuruṣasaṃjñitā | janmamṛtyujarātītā sarvaśaktisamanvitā ||

व्यापिनी चानवच्छिन्ना प्रधानानुप्रवेशिनी । क्षेत्रज्ञशक्तिरव्यक्तलक्षणा मूलवर्जिता ॥

vyāpinī cānavacchinnā pradhānānupraveśinī | kṣetrajñaśaktiravyaktalakṣaṇā mūlavarjitā ||

अनादिमायासंभिन्ना त्रितत्त्वा प्रकृतिर्गुहा । महामायासमुत्पन्ना तामसी पौरुषी ध्रुवा ॥

anādimāyāsaṃbhinnā tritattvā prakṛtirguhā | mahāmāyāsamutpannā tāmasī pauruṣī dhruvā ||

व्यक्ताव्यक्तात्मिका कृष्णा रक्ता शुक्ला प्रसूतिका । अकार्या कार्यजननी नित्यं प्रसवधर्मिणी ॥

vyaktāvyaktātmikā kṛṣṇā raktā śuklā prasūtikā | akāryā kāryajananī nityaṃ prasavadharmiṇī ||

सर्गप्रलयनिर्मुक्ता सृष्टिस्थित्यन्तधर्मिणी । ब्रह्मगर्भा चतुर्विंशा पद्मनाभाऽच्युतात्मिका ॥

sargapralayanirmuktā sṛṣṭisthityantadharmiṇī | brahmagarbhā caturviṃśā padmanābhā'cyutātmikā ||

वैद्युती शाश्वती योनिर्जगन्मातेश्वरप्रिया । सर्वाधारा महारूपा सर्वैश्वर्यसमन्विता ॥

vaidyutī śāśvatī yonirjaganmāteśvarapriyā | sarvādhārā mahārūpā sarvaiśvaryasamanvitā ||

विश्वरूपा महागर्भा विश्वेशेच्छानुवर्तिनी । महीयसी ब्रह्मयोनिर्महालक्ष्मीसमुद्भवा ॥

viśvarūpā mahāgarbhā viśveśecchānuvartinī | mahīyasī brahmayonirmahālakṣmīsamudbhavā ||

महाविमानमध्यस्था महानिद्रात्महेतुका । सर्वसाधारणी सूक्ष्मा ह्यविद्या पारमार्थिका ॥

mahāvimānamadhyasthā mahānidrātmahetukā | sarvasādhāraṇī sūkṣmā hyavidyā pāramārthikā ||

अनन्तरूपाऽनन्तस्था देवी पुरुषमोहिनी । अनेकाकारसंस्थाना कालत्रयविवर्जिता ॥

anantarūpā'nantasthā devī puruṣamohinī | anekākārasaṃsthānā kālatrayavivarjitā ||

ब्रह्मजन्मा हरेर्मूर्तिर्ब्रह्मविष्णुशिवात्मिका । ब्रह्मेशविष्णुजननी ब्रह्माख्या ब्रह्मसंश्रया ॥

brahmajanmā harermūrtirbrahmaviṣṇuśivātmikā | brahmeśaviṣṇujananī brahmākhyā brahmasaṃśrayā ||

व्यक्ता प्रथमजा ब्राह्मी महती ज्ञानरूपिणी । वैराग्यैश्वर्यधर्मात्मा ब्रह्ममूर्तिर्हृदिस्थिता । अपांयोनिः स्वयंभूतिर्मानसी तत्त्वसंभवा ॥

vyaktā prathamajā brāhmī mahatī jñānarūpiṇī | vairāgyaiśvaryadharmātmā brahmamūrtirhṛdisthitā | apāṃyoniḥ svayaṃbhūtirmānasī tattvasaṃbhavā ||

ईश्वराणी च शर्वाणी शंकरार्धशरीरिणी । भवानी चैव रुद्राणी महालक्ष्मीरथाम्बिका ॥

īśvarāṇī ca śarvāṇī śaṃkarārdhaśarīriṇī | bhavānī caiva rudrāṇī mahālakṣmīrathāmbikā ||

महेश्वरसमुत्पन्ना भुक्तिमुक्तिफलप्रदा । सर्वेश्वरी सर्ववन्द्या नित्यं मुदितमानसा ॥

maheśvarasamutpannā bhuktimuktiphalapradā | sarveśvarī sarvavandyā nityaṃ muditamānasā ||

ब्रह्मेन्द्रोपेन्द्रनमिता शंकरेच्छानुवर्तिनी । ईश्वरार्धासनगता महेश्वरपतिव्रता ॥

brahmendropendranamitā śaṃkarecchānuvartinī | īśvarārdhāsanagatā maheśvarapativratā ||

सकृद्विभाविता सर्वा समुद्रपरिशोषिणी । पार्वती हिमवत्पुत्री परमानन्ददायिनी ॥

sakṛdvibhāvitā sarvā samudrapariśoṣiṇī | pārvatī himavatputrī paramānandadāyinī ||

गुणाढ्या योगजा योग्या ज्ञानमूर्तिर्विकासिनी । सावित्री कमला लक्ष्मीः श्रीरनन्तोरसि स्थिता ॥

guṇāḍhyā yogajā yogyā jñānamūrtirvikāsinī | sāvitrī kamalā lakṣmīḥ śrīranantorasi sthitā ||

सरोजनिलया मुद्रा योगनिद्रा सुरार्दिनी । सरस्वती सर्वविद्या जगज्ज्येष्ठा सुमङ्गला ॥

sarojanilayā mudrā yoganidrā surārdinī | sarasvatī sarvavidyā jagajjyeṣṭhā sumaṅgalā ||

वाग्देवी वरदा वाच्या कीर्तिः सर्वार्थसाधिका । योगीश्वरी ब्रह्मविद्या महाविद्या सुशोभना ॥

vāgdevī varadā vācyā kīrtiḥ sarvārthasādhikā | yogīśvarī brahmavidyā mahāvidyā suśobhanā ||

गुह्यविद्यात्मविद्या च धर्मविद्यात्मभाविता । स्वाहा विश्वंभरा सिद्धिः स्वधा मेधा धृतिः श्रुतिः ॥

guhyavidyātmavidyā ca dharmavidyātmabhāvitā | svāhā viśvaṃbharā siddhiḥ svadhā medhā dhṛtiḥ śrutiḥ ||

नीतिः सुनीतिः सुकृतिर्माधवी नरवाहिनी । अजा विभावरी सौम्या भोगिनी भोगदायिनी ॥

nītiḥ sunītiḥ sukṛtirmādhavī naravāhinī | ajā vibhāvarī saumyā bhoginī bhogadāyinī ||

शोभा वंशकरी लोला मालिनी परमेष्ठिनी । त्रैलोक्यसुन्दरी रम्या सुन्दरी कामचारिणी ॥

śobhā vaṃśakarī lolā mālinī parameṣṭhinī | trailokyasundarī ramyā sundarī kāmacāriṇī ||

महानुभावा सत्त्वस्था महामहिषमर्दनी । पद्ममाला पापहरा विचित्रा मुकुटानना ॥

mahānubhāvā sattvasthā mahāmahiṣamardanī | padmamālā pāpaharā vicitrā mukuṭānanā ||

कान्ता चित्राम्बरधरा दिव्याभरणभूषिता । हंसाख्या व्योमनिलया जगत्सृष्टिविवर्धिनी ॥

kāntā citrāmbaradharā divyābharaṇabhūṣitā | haṃsākhyā vyomanilayā jagatsṛṣṭivivardhinī ||

निर्यन्त्रा यन्त्रवाहस्था नन्दिनी भद्रकालिका । आदित्यवर्णा कौमारी मयूरवरवाहिनी ॥

niryantrā yantravāhasthā nandinī bhadrakālikā | ādityavarṇā kaumārī mayūravaravāhinī ||

वृषासनगता गौरी महाकाली सुरार्चिता । अदितिर्नियता रौद्री पद्मगर्भा विवाहना ॥

vṛṣāsanagatā gaurī mahākālī surārcitā | aditirniyatā raudrī padmagarbhā vivāhanā ||

विरूपाक्षी लेलिहाना महापुरनिवासिनी । महाफलाऽनवद्याङ्गी कामपूरा विभावरी ॥

virūpākṣī lelihānā mahāpuranivāsinī | mahāphalā'navadyāṅgī kāmapūrā vibhāvarī ||

विचित्ररत्नमुकुटा प्रणतार्तिप्रभञ्जनी । कौशिकी कर्षणी रात्रिस्त्रिदशार्त्तिविनाशिनी ॥

vicitraratnamukuṭā praṇatārtiprabhañjanī | kauśikī karṣaṇī rātristridaśārttivināśinī ||

बहुरूपा सुरूपा च विरूपा रूपवर्जिता । भक्तार्तिशमनी भव्या भवभावविनाशिनी ॥

bahurūpā surūpā ca virūpā rūpavarjitā | bhaktārtiśamanī bhavyā bhavabhāvavināśinī ||

निर्गुणा नित्यविभवा निःसारा निरपत्रपा । यशस्विनी सामगीतिर्भवाङ्गनिलयालया ॥

nirguṇā nityavibhavā niḥsārā nirapatrapā | yaśasvinī sāmagītirbhavāṅganilayālayā ||

दीक्षा विद्याधरी दीप्ता महेन्द्रविनिपातिनी । सर्वातिशायिनी विद्या सर्वसिद्धिप्रदायिनी ॥

dīkṣā vidyādharī dīptā mahendravinipātinī | sarvātiśāyinī vidyā sarvasiddhipradāyinī ||

सर्वेश्वरप्रिया तार्क्ष्या समुद्रान्तरवासिनी । अकलङ्का निराधारा नित्यसिद्धा निरामया ॥

sarveśvarapriyā tārkṣyā samudrāntaravāsinī | akalaṅkā nirādhārā nityasiddhā nirāmayā ||

कामधेनुर्बृहद्गर्भा धीमती मोहनाशिनी । निःसङ्कल्पा निरातङ्का विनया विनयप्रदा ॥

kāmadhenurbṛhadgarbhā dhīmatī mohanāśinī | niḥsaṅkalpā nirātaṅkā vinayā vinayapradā ||

ज्वालामाला सहस्राढ्या देवदेवी मनोन्मनी । महाभगवती दुर्गा वासुदेवसमुद्भवा ॥

jvālāmālā sahasrāḍhyā devadevī manonmanī | mahābhagavatī durgā vāsudevasamudbhavā ||

महेन्द्रोपेन्द्रभगिनी भक्तिगम्या परावरा । ज्ञानज्ञेया जरातीता वेदान्तविषया गतिः ॥

mahendropendrabhaginī bhaktigamyā parāvarā | jñānajñeyā jarātītā vedāntaviṣayā gatiḥ ||

दक्षिणा दहना दाह्या सर्वभूतनमस्कृता । योगमाया विभावज्ञा महामाया महीयसी ॥

dakṣiṇā dahanā dāhyā sarvabhūtanamaskṛtā | yogamāyā vibhāvajñā mahāmāyā mahīyasī ||

संध्या सर्वसमुद्भूतिर्ब्रह्मवृक्षाश्रयानतिः । बीजाङ्कुरसमुद्भूतिर्महाशक्तिर्महामतिः ॥

saṃdhyā sarvasamudbhūtirbrahmavṛkṣāśrayānatiḥ | bījāṅkurasamudbhūtirmahāśaktirmahāmatiḥ ||

ख्यातिः प्रज्ञा चितिः संवित् महाभोगीन्द्रशायिनी । विकृतिः शांकरी शास्त्री गणगन्धर्वसेविता ॥

khyātiḥ prajñā citiḥ saṃvit mahābhogīndraśāyinī | vikṛtiḥ śāṃkarī śāstrī gaṇagandharvasevitā ||

वैश्वानरी महाशाला देवसेना गुहप्रिया । महारात्रिः शिवानन्दा शची दुःस्वप्ननाशिनी ॥

vaiśvānarī mahāśālā devasenā guhapriyā | mahārātriḥ śivānandā śacī duḥsvapnanāśinī ||

इज्या पूज्या जगद्धात्री दुर्विज्ञेया सुरूपिणी । गुहाम्बिका गुणोत्पत्तिर्महापीठा मरुत्सुता ॥

ijyā pūjyā jagaddhātrī durvijñeyā surūpiṇī | guhāmbikā guṇotpattirmahāpīṭhā marutsutā ||

हव्यवाहान्तर्यागादिः हव्यवाहसमुद्भवा । जगद्योनिर्जगन्माता जन्ममृत्युजरातिगा ॥

havyavāhāntaryāgādiḥ havyavāhasamudbhavā | jagadyonirjaganmātā janmamṛtyujarātigā ||

बुद्धिमाता बुद्धिमती पुरुषान्तरवासिनी । तरस्विनी समाधिस्था त्रिनेत्रा दिवि संस्थिता ॥

buddhimātā buddhimatī puruṣāntaravāsinī | tarasvinī samādhisthā trinetrā divi saṃsthitā ||

सर्वेन्द्रियमनोमाता सर्वभूतहृदि स्थिता । संसारतारिणी विद्या ब्रह्मवादिमनोलया ॥

sarvendriyamanomātā sarvabhūtahṛdi sthitā | saṃsāratāriṇī vidyā brahmavādimanolayā ||

ब्रह्माणी बृहती ब्राह्मी ब्रह्मभूता भवारणिः । हिरण्मयी महारात्रिः संसारपरिवर्त्तिका ॥

brahmāṇī bṛhatī brāhmī brahmabhūtā bhavāraṇiḥ | hiraṇmayī mahārātriḥ saṃsāraparivarttikā ||

सुमालिनी सुरूपा च भाविनी तारिणी प्रभा । उन्मीलनी सर्वसहा सर्वप्रत्ययसाक्षिणी ॥

sumālinī surūpā ca bhāvinī tāriṇī prabhā | unmīlanī sarvasahā sarvapratyayasākṣiṇī ||

सुसौम्या चन्द्रवदना ताण्डवासक्तमानसा । सत्त्वशुद्धिकरी शुद्धिर्मलत्रयविनाशिनी ॥

susaumyā candravadanā tāṇḍavāsaktamānasā | sattvaśuddhikarī śuddhirmalatrayavināśinī ||

जगत्प्रिया जगन्मूर्तिस्त्रिमूर्तिरमृताश्रया । निराश्रया निराहारा निरङ्कुरवनोद्भवा ॥

jagatpriyā jaganmūrtistrimūrtiramṛtāśrayā | nirāśrayā nirāhārā niraṅkuravanodbhavā ||

चन्द्रहस्ता विचित्राङ्गी स्रग्विणी पद्मधारिणी । परावरविधानज्ञा महापुरुषपूर्वजा ॥

candrahastā vicitrāṅgī sragviṇī padmadhāriṇī | parāvaravidhānajñā mahāpuruṣapūrvajā ||

विद्येश्वरप्रिया विद्या विद्युज्जिह्वा जितश्रमा । विद्यामयी सहस्राक्षी सहस्रवदनात्मजा ॥

vidyeśvarapriyā vidyā vidyujjihvā jitaśramā | vidyāmayī sahasrākṣī sahasravadanātmajā ||

सहस्ररश्मिः सत्त्वस्था महेश्वरपदाश्रया । क्षालिनी सन्मयी व्याप्ता तैजसी पद्मबोधिका ॥

sahasraraśmiḥ sattvasthā maheśvarapadāśrayā | kṣālinī sanmayī vyāptā taijasī padmabodhikā ||

महामायाश्रया मान्या महादेवमनोरमा । व्योमलक्ष्मीः सिंहरथा चेकितानाऽमितप्रभा ॥

mahāmāyāśrayā mānyā mahādevamanoramā | vyomalakṣmīḥ siṃharathā cekitānā'mitaprabhā ||

वीरेश्वरी विमानस्था विशोका शोकनाशिनी । अनाहता कुण्डलिनी नलिनी पद्मवासिनी ॥

vīreśvarī vimānasthā viśokā śokanāśinī | anāhatā kuṇḍalinī nalinī padmavāsinī ||

सदानन्दा सदाकीर्तिः सर्वभूताश्रयस्थिता । वाग्देवता ब्रह्मकला कलातीता कलारणिः ॥

sadānandā sadākīrtiḥ sarvabhūtāśrayasthitā | vāgdevatā brahmakalā kalātītā kalāraṇiḥ ||

ब्रह्मश्रीर्ब्रह्महृदया ब्रह्मविष्णुशिवप्रिया । व्योमशक्तिः क्रियाशक्तिर्ज्ञानशक्तिः परागतिः ॥

brahmaśrīrbrahmahṛdayā brahmaviṣṇuśivapriyā | vyomaśaktiḥ kriyāśaktirjñānaśaktiḥ parāgatiḥ ||

क्षोभिका बन्धिका भेद्या भेदाभेदविवर्जिता । अभिन्नाभिन्नसंस्थाना वंशिनी वंशहारिणी ॥

kṣobhikā bandhikā bhedyā bhedābhedavivarjitā | abhinnābhinnasaṃsthānā vaṃśinī vaṃśahāriṇī ||

गुह्यशक्तिर्गुणातीता सर्वदा सर्वतोमुखी । भगिनी भगवत्पत्नी सकला कालकारिणी ॥

guhyaśaktirguṇātītā sarvadā sarvatomukhī | bhaginī bhagavatpatnī sakalā kālakāriṇī ||

सर्ववित् सर्वतोभद्रा गुह्यातीता गुहारणिः । प्रक्रिया योगमाता च गङ्गा विश्वेश्वरेश्वरी ॥

sarvavit sarvatobhadrā guhyātītā guhāraṇiḥ | prakriyā yogamātā ca gaṅgā viśveśvareśvarī ||

कपिला कापिला कान्ता कनकाभा कलान्तरा । पुण्या पुष्करिणी भोक्त्री पुरंदरपुरस्सरा ॥

kapilā kāpilā kāntā kanakābhā kalāntarā | puṇyā puṣkariṇī bhoktrī puraṃdarapurassarā ||

पोषणी परमैश्वर्यभूतिदा भूतिभूषणा । पञ्चब्रह्मसमुत्पत्तिः परमार्थार्थविग्रहा ॥

poṣaṇī paramaiśvaryabhūtidā bhūtibhūṣaṇā | pañcabrahmasamutpattiḥ paramārthārthavigrahā ||

धर्मोदया भानुमती योगिज्ञेया मनोजवा । मनोहरा मनोरक्षा तापसी वेदरूपिणी ॥

dharmodayā bhānumatī yogijñeyā manojavā | manoharā manorakṣā tāpasī vedarūpiṇī ||

वेदशक्तिर्वेदमाता वेदविद्याप्रकाशिनी । योगेश्वरेश्वरी माता महाशक्तिर्मनोमयी ॥

vedaśaktirvedamātā vedavidyāprakāśinī | yogeśvareśvarī mātā mahāśaktirmanomayī ||

विश्वावस्था वियन्मूर्तिर्विद्युन्माला विहायसी । किन्नरी सुरभी वन्द्या नन्दिनी नन्दिवल्लभा ॥

viśvāvasthā viyanmūrtirvidyunmālā vihāyasī | kinnarī surabhī vandyā nandinī nandivallabhā ||

भारती परमानन्दा परापरविभेदिका । सर्वप्रहरणोपेता काम्या कामेश्वरेश्वरी ॥

bhāratī paramānandā parāparavibhedikā | sarvapraharaṇopetā kāmyā kāmeśvareśvarī ||

अचिन्त्याऽचिन्त्यविभवा हृल्लेखा कनकप्रभा । कूष्माण्डी धनरत्नाढ्या सुगन्धा गन्धदायिनी ॥

acintyā'cintyavibhavā hṛllekhā kanakaprabhā | kūṣmāṇḍī dhanaratnāḍhyā sugandhā gandhadāyinī ||

त्रिविक्रमपदोद्भूता धनुष्पाणिः शिवोदया । सुदुर्लभा धनाध्यक्षा धन्या पिङ्गललोचना ॥

trivikramapadodbhūtā dhanuṣpāṇiḥ śivodayā | sudurlabhā dhanādhyakṣā dhanyā piṅgalalocanā ||

शान्तिः प्रभावती दीप्तिः पङ्कजायतलोचना । आद्या हृत्कमलोद्भूता गवां माता रणप्रिया ॥

śāntiḥ prabhāvatī dīptiḥ paṅkajāyatalocanā | ādyā hṛtkamalodbhūtā gavāṃ mātā raṇapriyā ||

सत्क्रिया गिरिजा शुद्धा नित्यपुष्टा निरन्तरा । दुर्गाकात्यायनी चण्डी चर्चिका शान्तविग्रहा ॥

satkriyā girijā śuddhā nityapuṣṭā nirantarā | durgākātyāyanī caṇḍī carcikā śāntavigrahā ||

हिरण्यवर्णा रजनी जगद्यन्त्रप्रवर्तिका । मन्दराद्रिनिवासा च शारदा स्वर्णमालिनी ॥

hiraṇyavarṇā rajanī jagadyantrapravartikā | mandarādrinivāsā ca śāradā svarṇamālinī ||

रत्नमाला रत्नगर्भा पृथ्वी विश्वप्रमाथिनी । पद्मानना पद्मनिभा नित्यतुष्टाऽमृतोद्भवा ॥

ratnamālā ratnagarbhā pṛthvī viśvapramāthinī | padmānanā padmanibhā nityatuṣṭā'mṛtodbhavā ||

धुन्वती दुःप्रकम्प्या च सूर्यमाता दृषद्वती । महेन्द्रभगिनी मान्या वरेण्या वरदर्पिता ॥

dhunvatī duḥprakampyā ca sūryamātā dṛṣadvatī | mahendrabhaginī mānyā vareṇyā varadarpitā ||

कल्याणी कमला रामा पञ्चभूता वरप्रदा । वाच्या वरेश्वरी वन्द्या दुर्जया दुरतिक्रमा ॥

kalyāṇī kamalā rāmā pañcabhūtā varapradā | vācyā vareśvarī vandyā durjayā duratikramā ||

कालरात्रिर्महावेगा वीरभद्रप्रिया हिता । भद्रकाली जगन्माता भक्तानां भद्रदायिनी ॥

kālarātrirmahāvegā vīrabhadrapriyā hitā | bhadrakālī jaganmātā bhaktānāṃ bhadradāyinī ||

कराला पिङ्गलाकारा नामभेदाऽमहामदा । यशस्विनी यशोदा च षडध्वपरिवर्त्तिका ॥

karālā piṅgalākārā nāmabhedā'mahāmadā | yaśasvinī yaśodā ca ṣaḍadhvaparivarttikā ||

शङ्खिनी पद्मिनी सांख्या सांख्ययोगप्रवर्तिका । चैत्रा संवत्सरारूढा जगत्संपूरणीन्द्रजा ॥

śaṅkhinī padminī sāṃkhyā sāṃkhyayogapravartikā | caitrā saṃvatsarārūḍhā jagatsaṃpūraṇīndrajā ||

शुम्भारिः खेचरी स्वस्था कम्बुग्रीवा कलिप्रिया । खगध्वजा खगारूढा परार्ध्या परमालिनी ॥

śumbhāriḥ khecarī svasthā kambugrīvā kalipriyā | khagadhvajā khagārūḍhā parārdhyā paramālinī ||

ऐश्वर्यवर्त्मनिलया विरक्ता गरुडासना । जयन्ती हृद्गुहा रम्या गह्वरेष्ठा गणाग्रणीः ॥

aiśvaryavartmanilayā viraktā garuḍāsanā | jayantī hṛdguhā ramyā gahvareṣṭhā gaṇāgraṇīḥ ||

संकल्पसिद्धा साम्यस्था सर्वविज्ञानदायिनी । कलिकल्मषहन्त्री च गुह्योपनिषदुत्तमा ॥

saṃkalpasiddhā sāmyasthā sarvavijñānadāyinī | kalikalmaṣahantrī ca guhyopaniṣaduttamā ||

निष्ठा दृष्टिः स्मृतिर्व्याप्तिः पुष्टिस्तुष्टिः क्रियावती । विश्वामरेश्वरेशाना भुक्तिर्मुक्तिः शिवाऽमृता ॥

niṣṭhā dṛṣṭiḥ smṛtirvyāptiḥ puṣṭistuṣṭiḥ kriyāvatī | viśvāmareśvareśānā bhuktirmuktiḥ śivā'mṛtā ||

लोहिता सर्पमाला च भीषणी वनमालिनी । अनन्तशयनाऽनन्या नरनारायणोद्भवा ॥

lohitā sarpamālā ca bhīṣaṇī vanamālinī | anantaśayanā'nanyā naranārāyaṇodbhavā ||

नृसिंही दैत्यमथनी शङ्खचक्रगदाधरा । संकर्षणसमुत्पत्तिरम्बिकापादसंश्रया ॥

nṛsiṃhī daityamathanī śaṅkhacakragadādharā | saṃkarṣaṇasamutpattirambikāpādasaṃśrayā ||

महाज्वाला महामूर्तिः सुमूर्तिः सर्वकामधुक् । सुप्रभा सुस्तना गौरी धर्मकामार्थमोक्षदा ॥

mahājvālā mahāmūrtiḥ sumūrtiḥ sarvakāmadhuk | suprabhā sustanā gaurī dharmakāmārthamokṣadā ||

भ्रूमध्यनिलया पूर्वा पुराणपुरुषारणिः । महाविभूतिदा मध्या सरोजनयना समा ॥

bhrūmadhyanilayā pūrvā purāṇapuruṣāraṇiḥ | mahāvibhūtidā madhyā sarojanayanā samā ||

अष्टादशभुजाऽनाद्या नीलोत्पलदलप्रभा । सर्वशक्त्यासनारूढा धर्माधर्मार्थवर्जिता ॥

aṣṭādaśabhujā'nādyā nīlotpaladalaprabhā | sarvaśaktyāsanārūḍhā dharmādharmārthavarjitā ||

वैराग्यज्ञाननिरता निरालोका निरिन्द्रिया । विचित्रगहनाधारा शाश्वतस्थानवासिनी ॥

vairāgyajñānaniratā nirālokā nirindriyā | vicitragahanādhārā śāśvatasthānavāsinī ||

स्थानेश्वरी निरानन्दा त्रिशूलवरधारिणी । अशेषदेवतामूर्तिर्देवता वरदेवता । गणाम्बिका गिरेः पुत्री निशुम्भविनिपातिनी ॥

sthāneśvarī nirānandā triśūlavaradhāriṇī | aśeṣadevatāmūrtirdevatā varadevatā | gaṇāmbikā gireḥ putrī niśumbhavinipātinī ||

अवर्णा वर्णरहिता निवर्णा बीजसंभवा । अनन्तवर्णाऽनन्यस्था शंकरी शान्तमानसा ॥

avarṇā varṇarahitā nivarṇā bījasaṃbhavā | anantavarṇā'nanyasthā śaṃkarī śāntamānasā ||

अगोत्रा गोमती गोप्त्री गुह्यरूपा गुणोत्तरा । गौर्गीर्गव्यप्रिया गौणी गणेश्वरनमस्कृता ॥

agotrā gomatī goptrī guhyarūpā guṇottarā | gaurgīrgavyapriyā gauṇī gaṇeśvaranamaskṛtā ||

सत्यमात्रा सत्यसंधा त्रिसंध्या संधिवर्जिता । सर्ववादाश्रया संख्या सांख्ययोगसमुद्भवा ॥

satyamātrā satyasaṃdhā trisaṃdhyā saṃdhivarjitā | sarvavādāśrayā saṃkhyā sāṃkhyayogasamudbhavā ||

असंख्येयाऽप्रमेयाख्या शून्या शुद्धकुलोद्भवा । बिन्दुनादसमुत्पत्तिः शंभुवामा शशिप्रभा ॥

asaṃkhyeyā'prameyākhyā śūnyā śuddhakulodbhavā | bindunādasamutpattiḥ śaṃbhuvāmā śaśiprabhā ||

विसङ्गा भेदरहिता मनोज्ञा मधुसूदनी । महाश्रीः श्रीसमुत्पत्तिस्तमःपारे प्रतिष्ठिता ॥

visaṅgā bhedarahitā manojñā madhusūdanī | mahāśrīḥ śrīsamutpattistamaḥpāre pratiṣṭhitā ||

त्रितत्त्वमाता त्रिविधा सुसूक्ष्मपदसंश्रया । शान्त्यतीता मलातीता निर्विकारा निराश्रया ॥

tritattvamātā trividhā susūkṣmapadasaṃśrayā | śāntyatītā malātītā nirvikārā nirāśrayā ||

शिवाख्या चित्तनिलया शिवज्ञानस्वरूपिणी । दैत्यदानवनिर्मात्री काश्यपी कालकल्पिका ॥

śivākhyā cittanilayā śivajñānasvarūpiṇī | daityadānavanirmātrī kāśyapī kālakalpikā ||

शास्त्रयोनिः क्रियामूर्तिश्चतुर्वर्गप्रदर्शिका । नारायणी नरोद्भूतिः कौमुदी लिङ्गधारिणी ॥

śāstrayoniḥ kriyāmūrtiścaturvargapradarśikā | nārāyaṇī narodbhūtiḥ kaumudī liṅgadhāriṇī ||

कामुकी ललिता भावा परापरविभूतिदा । परान्तजातमहिमा बडवा वामलोचना ॥

kāmukī lalitā bhāvā parāparavibhūtidā | parāntajātamahimā baḍavā vāmalocanā ||

सुभद्रा देवकी सीता वेदवेदाङ्गपारगा । मनस्विनी मन्युमाता महामन्युसमुद्भवा ॥

subhadrā devakī sītā vedavedāṅgapāragā | manasvinī manyumātā mahāmanyusamudbhavā ||

अमृत्युरमृता स्वाहा पुरुहूता पुरुष्टुता । अशोच्या भिन्नविषया हिरण्यरजतप्रिया ॥

amṛtyuramṛtā svāhā puruhūtā puruṣṭutā | aśocyā bhinnaviṣayā hiraṇyarajatapriyā ||

हिरण्या राजती हैमी हेमाभरणभूषिता । विभ्राजमाना दुर्ज्ञेया ज्योतिष्टोमफलप्रदा ॥

hiraṇyā rājatī haimī hemābharaṇabhūṣitā | vibhrājamānā durjñeyā jyotiṣṭomaphalapradā ||

महानिद्रासमुद्भूतिरनिद्रा सत्यदेवता । दीर्घा ककुद्मिनी हृद्या शान्तिदा शान्तिवर्धिनी ॥

mahānidrāsamudbhūtiranidrā satyadevatā | dīrghā kakudminī hṛdyā śāntidā śāntivardhinī ||

लक्ष्म्यादिशक्तिजननी शक्तिचक्रप्रवर्तिका । त्रिशक्तिजननी जन्या षडूर्मिपरिवर्जिता ॥

lakṣmyādiśaktijananī śakticakrapravartikā | triśaktijananī janyā ṣaḍūrmiparivarjitā ||

सुधामा कर्मकरणी युगान्तदहनात्मिका । संकर्षणी जगद्धात्री कामयोनिः किरीटिनी ॥

sudhāmā karmakaraṇī yugāntadahanātmikā | saṃkarṣaṇī jagaddhātrī kāmayoniḥ kirīṭinī ||

ऐन्द्री त्रैलोक्यनमिता वैष्णवी परमेश्वरी । प्रद्युम्नदयिता दान्ता युग्मदृष्टिस्त्रिलोचना ॥

aindrī trailokyanamitā vaiṣṇavī parameśvarī | pradyumnadayitā dāntā yugmadṛṣṭistrilocanā ||

मदोत्कटा हंसगतिः प्रचण्डा चण्डविक्रमा । वृषावेशा वियन्माता विन्ध्यपर्वतवासिनी ॥

madotkaṭā haṃsagatiḥ pracaṇḍā caṇḍavikramā | vṛṣāveśā viyanmātā vindhyaparvatavāsinī ||

हिमवन्मेरुनिलया कैलासगिरिवासिनी । चाणूरहन्तृतनया नीतिज्ञा कामरूपिणी ॥

himavanmerunilayā kailāsagirivāsinī | cāṇūrahantṛtanayā nītijñā kāmarūpiṇī ||

वेदविद्याव्रतस्नाता धर्मशीलाऽनिलाशना । वीरभद्रप्रिया वीरा महाकालसमुद्भवा ॥

vedavidyāvratasnātā dharmaśīlā'nilāśanā | vīrabhadrapriyā vīrā mahākālasamudbhavā ||

विद्याधरप्रिया सिद्धा विद्याधरनिराकृतिः । आप्यायनी हरन्ती च पावनी पोषणी खिला ॥

vidyādharapriyā siddhā vidyādharanirākṛtiḥ | āpyāyanī harantī ca pāvanī poṣaṇī khilā ||

मातृका मन्मथोद्भूता वारिजा वाहनप्रिया । करीषिणी सुधावाणी वीणावादनतत्परा ॥

mātṛkā manmathodbhūtā vārijā vāhanapriyā | karīṣiṇī sudhāvāṇī vīṇāvādanatatparā ||

सेविता सेविका सेव्या सिनीवाली गुरुत्मती । अरुन्धती हिरण्याक्षी मृगाङ्का मानदायिनी ॥

sevitā sevikā sevyā sinīvālī gurutmatī | arundhatī hiraṇyākṣī mṛgāṅkā mānadāyinī ||

वसुप्रदा वसुमती वसोर्धारा वसुंधरा । धराधरा वरारोहा वरावरसहस्रदा ॥

vasupradā vasumatī vasordhārā vasuṃdharā | dharādharā varārohā varāvarasahasradā ||

श्रीफला श्रीमती श्रीशा श्रीनिवासा शिवप्रिया । श्रीधरा श्रीकरी कल्या श्रीधरार्धशरीरिणी ॥

śrīphalā śrīmatī śrīśā śrīnivāsā śivapriyā | śrīdharā śrīkarī kalyā śrīdharārdhaśarīriṇī ||

अनन्तदृष्टिरक्षुद्रा धात्रीशा धनदप्रिया । निहन्त्री दैत्यसङ्घानां सिंहिका सिंहवाहना ॥

anantadṛṣṭirakṣudrā dhātrīśā dhanadapriyā | nihantrī daityasaṅghānāṃ siṃhikā siṃhavāhanā ||

सुषेणा चन्द्रनिलया सुकीर्तिश्छिन्नसंशया । रसज्ञा रसदा रामा लेलिहानाऽमृतस्रवा ॥

suṣeṇā candranilayā sukīrtiśchinnasaṃśayā | rasajñā rasadā rāmā lelihānā'mṛtasravā ||

नित्योदिता स्वयंज्योतिरुत्सुका मृतजीवनी । वज्रदण्डा वज्रजिह्वा वैदेही वज्रविग्रहा ॥

nityoditā svayaṃjyotirutsukā mṛtajīvanī | vajradaṇḍā vajrajihvā vaidehī vajravigrahā ||

मङ्गल्या मङ्गला माला मलिना मलहारिणी । गान्धर्वी गारुडी चान्द्री कम्बलाश्वतरप्रिया ॥

maṅgalyā maṅgalā mālā malinā malahāriṇī | gāndharvī gāruḍī cāndrī kambalāśvatarapriyā ||

सौदामिनी जनानन्दा भ्रुकुटीकुटिलानना । कर्णिकारकरा कक्ष्या कंसप्राणापहारिणी ॥

saudāminī janānandā bhrukuṭīkuṭilānanā | karṇikārakarā kakṣyā kaṃsaprāṇāpahāriṇī ||

युगंधरा युगावर्त्ता त्रिसंध्या हर्षवर्धनी । प्रत्यक्षदेवता दिव्या दिव्यगन्धा दिवापरा ॥

yugaṃdharā yugāvarttā trisaṃdhyā harṣavardhanī | pratyakṣadevatā divyā divyagandhā divāparā ||

शक्रासनगता शाक्री साध्वी नारी शवासना । इष्टा विशिष्टा शिष्टेष्टा शिष्टाशिष्टप्रपूजिता ॥

śakrāsanagatā śākrī sādhvī nārī śavāsanā | iṣṭā viśiṣṭā śiṣṭeṣṭā śiṣṭāśiṣṭaprapūjitā ||

शतरूपा शतावर्त्ता विनता सुरभिः सुरा । सुरेन्द्रमाता सुद्युम्ना सुषुम्ना सूर्यसंस्थिता ॥

śatarūpā śatāvarttā vinatā surabhiḥ surā | surendramātā sudyumnā suṣumnā sūryasaṃsthitā ||

समीक्ष्या सत्प्रतिष्ठा च निवृत्तिर्ज्ञानपारगा । धर्मशास्त्रार्थकुशला धर्मज्ञा धर्मवाहना ॥

samīkṣyā satpratiṣṭhā ca nivṛttirjñānapāragā | dharmaśāstrārthakuśalā dharmajñā dharmavāhanā ||

धर्माधर्मविनिर्मात्री धार्मिकाणां शिवप्रदा । धर्मशक्तिर्धर्ममयी विधर्मा विश्वधर्मिणी ॥

dharmādharmavinirmātrī dhārmikāṇāṃ śivapradā | dharmaśaktirdharmamayī vidharmā viśvadharmiṇī ||

धर्मान्तरा धर्ममेघा धर्मपूर्वा धनावहा । धर्मोपदेष्ट्री धर्मात्मा धर्मगम्या धराधरा ॥

dharmāntarā dharmameghā dharmapūrvā dhanāvahā | dharmopadeṣṭrī dharmātmā dharmagamyā dharādharā ||

कापालीशा कलामूर्तिः कलाकलितविग्रहा । सर्वशक्तिविनिर्मुक्ता सर्वशक्त्याश्रयाश्रया ॥

kāpālīśā kalāmūrtiḥ kalākalitavigrahā | sarvaśaktivinirmuktā sarvaśaktyāśrayāśrayā ||

सर्वा सर्वेश्वरी सूक्ष्मा सुसूक्ष्मा ज्ञानरूपिणी । प्रधानपुरुषेशेशा महादेवैकसाक्षिणी । सदाशिवा वियन्मूर्तिर्विश्वमूर्तिरमूर्तिका ॥

sarvā sarveśvarī sūkṣmā susūkṣmā jñānarūpiṇī | pradhānapuruṣeśeśā mahādevaikasākṣiṇī | sadāśivā viyanmūrtirviśvamūrtiramūrtikā ||

एवं नाम्नां सहस्रेण स्तुत्वाऽसौ हिमवान् गिरिः । भूयः प्रणम्य भीतात्मा प्रोवाचेदं कृताञ्जलिः ॥

evaṃ nāmnāṃ sahasreṇa stutvā'sau himavān giriḥ | bhūyaḥ praṇamya bhītātmā provācedaṃ kṛtāñjaliḥ ||

यदेतदैश्वरं रूपं घोरं ते परमेश्वरि । भीतोऽस्मि साम्प्रतं दृष्ट्वा रूपमन्यत् प्रदर्शय ॥

yadetadaiśvaraṃ rūpaṃ ghoraṃ te parameśvari | bhīto'smi sāmprataṃ dṛṣṭvā rūpamanyat pradarśaya ||

एवमुक्ताऽथ सा देवी तेन शैलेन पार्वती । संहृत्य दर्शयामास स्वरूपमपरं पुनः ॥

evamuktā'tha sā devī tena śailena pārvatī | saṃhṛtya darśayāmāsa svarūpamaparaṃ punaḥ ||

नीलोत्पलदलप्रख्यं नीलोत्पलसुगन्धिकम् । द्विनेत्रं द्विभुजं सौम्यं नीलालकविभूषितम् ॥

nīlotpaladalaprakhyaṃ nīlotpalasugandhikam | dvinetraṃ dvibhujaṃ saumyaṃ nīlālakavibhūṣitam ||

रक्तपादाम्बुजतलं सुरक्तकरपल्लवम् । श्रीमद् विशालसंवृत्तललाटतिलकोज्ज्वलम् ॥

raktapādāmbujatalaṃ suraktakarapallavam | śrīmad viśālasaṃvṛttalalāṭatilakojjvalam ||

भूषितं चारुसर्वाङ्गं भूषणैरतिकोमलम् । दधानमुरसा मालां विशालां हेमनिर्मिताम् ॥

bhūṣitaṃ cārusarvāṅgaṃ bhūṣaṇairatikomalam | dadhānamurasā mālāṃ viśālāṃ hemanirmitām ||

ईषत्स्मितं सुबिम्बोष्ठं नूपुरारावसंयुतम् । प्रसन्नवदनं दिव्यमनन्तमहिमास्पदम् ॥

īṣatsmitaṃ subimboṣṭhaṃ nūpurārāvasaṃyutam | prasannavadanaṃ divyamanantamahimāspadam ||

तदीदृशं समालोक्य स्वरूपं शैलसत्तमः । भीतिं संत्यज्य हृष्टात्मा बभाषे परमेश्वरीम् ॥

tadīdṛśaṃ samālokya svarūpaṃ śailasattamaḥ | bhītiṃ saṃtyajya hṛṣṭātmā babhāṣe parameśvarīm ||