लिङ्गाष्टकम्

लिङ्गाष्टकम् ब्रह्ममुरारिसुरार्चितलिङ्गम् निर्मलभासितशोभितलिङ्गम् । जन्मजदुःखविनाशकलिङ्गम् तत् प्रणमामि सदाशिवलिङ्गम् ॥

liṅgāṣṭakam brahmamurārisurārcitaliṅgam nirmalabhāsitaśobhitaliṅgam | janmajaduḥkhavināśakaliṅgam tat praṇamāmi sadāśivaliṅgam ||

देवमुनिप्रवरार्चितलिङ्गम् कामदहम् करुणाकर लिङ्गम् । रावणदर्पविनाशनलिङ्गम् तत् प्रणमामि सदाशिव लिङ्गम् ॥

devamunipravarārcitaliṅgam kāmadaham karuṇākara liṅgam | rāvaṇadarpavināśanaliṅgam tat praṇamāmi sadāśiva liṅgam ||

सर्वसुगन्धिसुलेपितलिङ्गम् बुद्धिविवर्धनकारणलिङ्गम् । सिद्धसुरासुरवन्दितलिङ्गम् तत् प्रणमामि सदाशिव लिङ्गम् ॥

sarvasugandhisulepitaliṅgam buddhivivardhanakāraṇaliṅgam | siddhasurāsuravanditaliṅgam tat praṇamāmi sadāśiva liṅgam ||

कनकमहामणिभूषितलिङ्गम् फणिपतिवेष्टित शोभित लिङ्गम् । दक्षसुयज्ञविनाशन लिङ्गम् तत् प्रणमामि सदाशिव लिङ्गम् ॥

kanakamahāmaṇibhūṣitaliṅgam phaṇipativeṣṭita śobhita liṅgam | dakṣasuyajñavināśana liṅgam tat praṇamāmi sadāśiva liṅgam ||

कुङ्कुमचन्दनलेपितलिङ्गम् पङ्कजहारसुशोभितलिङ्गम् । सञ्चितपापविनाशनलिङ्गम् तत् प्रणमामि सदाशिव लिङ्गम् ॥

kuṅkumacandanalepitaliṅgam paṅkajahārasuśobhitaliṅgam | sañcitapāpavināśanaliṅgam tat praṇamāmi sadāśiva liṅgam ||

देवगणार्चित सेवितलिङ्गम् भावैर्भक्तिभिरेव च लिङ्गम् । दिनकरकोटिप्रभाकरलिङ्गम् तत् प्रणमामि सदाशिव लिङ्गम् ॥

devagaṇārcita sevitaliṅgam bhāvairbhaktibhireva ca liṅgam | dinakarakoṭiprabhākaraliṅgam tat praṇamāmi sadāśiva liṅgam ||

अष्टदलोपरिवेष्टितलिङ्गम् सर्वसमुद्भवकारणलिङ्गम् । अष्टदरिद्रविनाशनलिङ्गम् तत् प्रणमामि सदाशिव लिङ्गम् ॥

aṣṭadalopariveṣṭitaliṅgam sarvasamudbhavakāraṇaliṅgam | aṣṭadaridravināśanaliṅgam tat praṇamāmi sadāśiva liṅgam ||

सुरगुरुसुरवरपूजित लिङ्गम् सुरवनपुष्प सदार्चित लिङ्गम् । परात्परं परमात्मक लिङ्गम् तत् प्रणमामि सदाशिव लिङ्गम् ॥

suragurusuravarapūjita liṅgam suravanapuṣpa sadārcita liṅgam | parātparaṃ paramātmaka liṅgam tat praṇamāmi sadāśiva liṅgam ||

लिङ्गाष्टकमिदं पुण्यं यः पठेत् शिवसन्निधौ । शिवलोकमवाप्नोति शिवेन सह मोदते ॥

liṅgāṣṭakamidaṃ puṇyaṃ yaḥ paṭhet śivasannidhau | śivalokamavāpnoti śivena saha modate ||