निर्वाणषट्कम्

मनोबुद्ध्यहङ्कारचित्तानि नाहं न च श्रोत्रजिह्वे न च घ्राणनेत्रे । न च व्योम भूमिर्न तेजो न वायुश्चिदानन्दरूपः शिवोऽहं शिवोऽहम् ॥

manobuddhyahaṅkāracittāni nāhaṃ na ca śrotrajihve na ca ghrāṇanetre | na ca vyoma bhūmirna tejo na vāyuścidānandarūpaḥ śivo'haṃ śivo'ham ||

न च प्राणसंज्ञो न वै पञ्चवायुर्न वा सप्तधातुर्न वा पञ्चकोशः । न वाक्पाणिपादौ न चोपस्थपायू चिदानन्दरूपः शिवोऽहं शिवोऽहम् ॥

na ca prāṇasaṃjño na vai pañcavāyurna vā saptadhāturna vā pañcakośaḥ | na vākpāṇipādau na copasthapāyū cidānandarūpaḥ śivo'haṃ śivo'ham ||

न मे द्वेषरागौ न मे लोभमोहौ मदो नैव मे नैव मात्सर्यभावः । न धर्मो न चार्थो न कामो न मोक्षश्चिदानन्दरूपः शिवोऽहं शिवोऽहम् ॥

na me dveṣarāgau na me lobhamohau mado naiva me naiva mātsaryabhāvaḥ | na dharmo na cārtho na kāmo na mokṣaścidānandarūpaḥ śivo'haṃ śivo'ham ||

न पुण्यं न पापं न सौख्यं न दुःखं न मन्त्रो न तीर्थं न वेदा न यज्ञाः । अहं भोजनं नैव भोज्यं न भोक्ता चिदानन्दरूपः शिवोऽहं शिवोऽहम् ॥

na puṇyaṃ na pāpaṃ na saukhyaṃ na duḥkhaṃ na mantro na tīrthaṃ na vedā na yajñāḥ | ahaṃ bhojanaṃ naiva bhojyaṃ na bhoktā cidānandarūpaḥ śivo'haṃ śivo'ham ||

न मृत्युर्न शङ्का न मे जातिभेदः पिता नैव मे नैव माता न जन्म । न बन्धुर्न मित्रं गुरुर्नैव शिष्यश्चिदानन्दरूपः शिवोऽहं शिवोऽहम् ॥

na mṛtyurna śaṅkā na me jātibhedaḥ pitā naiva me naiva mātā na janma | na bandhurna mitraṃ gururnaiva śiṣyaścidānandarūpaḥ śivo'haṃ śivo'ham ||

अहं निर्विकल्पो निराकाररूपो विभुर्व्याप्य सर्वत्र सर्वेन्द्रियाणाम् । सदा मे समत्वं न मुक्तिर्न बन्धश्चिदानन्दरूपः शिवोऽहं शिवोऽहम् ॥

ahaṃ nirvikalpo nirākārarūpo vibhurvyāpya sarvatra sarvendriyāṇām | sadā me samatvaṃ na muktirna bandhaścidānandarūpaḥ śivo'haṃ śivo'ham ||